არჩილ თალაკვაძე ე.წ. 40%-იან ბარიერზე: მზად ვართ, რომ ეს შეთანხმების მთავარი პუნქტი იყოს

„ქართულ ოცნებას“ არცერთ არჩევნებში 40%-ზე ნაკლები მხარდაჭერა არ მიუღია, ყველა საპარლამენტო არჩევნებში ჩვენ გვქონდა 40%-ზე მეტი და ამ არჩევნებზეც ვგეგმავთ, რომ მივიღოთ 40%-ზე მეტი, - ამის შესახებ ჟურნალისტებს პარლამენტის თავმჯდომარემ, არჩილ თალაკვაძემ განუცხადა.

მისივე თქმით, თუ ეს არის მთავარი საკითხი და პრინციპული მოთხოვნა ამ არჩევნებზე შეთანხმების მისაღწევად, რომ 40%-იანი მხარდაჭერით დააკომპლექტოს გამარჯვებულმა პარტიამ მთავრობა და მიიღოს უმრავლესობა, რა თქმა უნდა, მმართველი ძალა ისედაც ასე ფიქრობდა და მზად არის, რომ ეს შეთანხმების მთავარი პუნქტი იყოს.

„ქართულ ოცნებას“ არცერთ არჩევნებში 40%-ზე ნაკლები მხარდაჭერა არ მიუღია. ყველა საპარლამენტო არჩევნებში ჩვენ გვქონდა 40%-ზე მეტი. ამ არჩევნებშიც ვგეგმავთ, რომ მივიღოთ 40%-ზე მეტი, შესაბამისად, თუ ეს არის მთავარი საკითხი და პრინციპული მოთხოვნა ამ არჩევნებზე შეთანხმების მისაღწევად, რომ 40%-იანი მხარდაჭერით დააკომპლექტოს გამარჯვებულმა პარტიამ მთავრობა და მიიღოს უმრავლესობა, რა თქმა უნდა, ჩვენ ისედაც ასე ვფიქრობდით და მზად ვართ, რომ ეს შეთანხმების მთავარი პუნქტი იყოს. რაც შეეხება პროპორციებს, მიგვაჩნია, რომ 100/50-ზე არის ლოგიკური განაწილება, იმიტომ რომ შეფარდება არის ერთი მესამედი ორ მესამედთან, ასევე 40-დან 50 მაჟორიტარამდე არის ის ოპტიმალური რაოდენობა, რომელიც შესაძლებელია გეორგაფიულად და ადმინისტრაციულად საარჩევნო ოლქებზე გადანაწილდეს. უფრო ნაკლები რაოდენობა, სამწუხაროდ, ისეთი მუნიციპალიტეტების ხელოვნურ შეერთებას იწვევს, რომლის არჩეულ მაჟორიტარებს ძალიან გაუჭირდება მუშაობა და ეს მნიშვნელოვნად დააზიანებს ადგილობრივი საზოგადოების ინტერესებს.

იმ მთავარ პრინციპზე შეთანხმებით, რომელიც უკავშირდება 40%-იან ზღვარს, უკვე მეორე და მესამეხარისხოვანია მაჟორიტარული და პროპორციული ადგილების რაოდენობა. მინდა მადლობა გადავუხადო პარტნიორებს - ამერიკისა და გერმანიის საელჩოები, ევროკავშირის წარმომადგენლობა არიან ერთ პოზიციაზე ჩვენთან, რომ დიალოგი უნდა გაგრძელდეს და დასრულდეს კონკრეტული შედეგით. მადლობა პარტნიორებს, რომ გვეხმარებიან შეთანხმების მიღწევაში. ველით, რომ ოპოზიცია მოლაპარაკებებს დაუბრუნდება და შევძლებთ შეთანხმებას. ესაა საზოგადოების დაკვეთა და ქვეყნის ეროვნული ინტერესი“, - განაცხადა პარლამენტის თავმჯდომარემ.

„ქრონიკის“ ინფორმაციით, ოპოზიციასთან შეხვედრა თბილისში გერმანიის საელჩოში იმართება. საპარლამენტო უმრავლესობის წევრი ირაკლი კობახიძე და პარლამენტის თავმჯდომარე საელჩოში შეხვედრამდე 1 საათით ადრე მივიდნენ.

27 თებერვალს საპარლამენტო უმრავლესობის წევრმა, ირაკლი კობახიძემ ოპოზიციისთვის 110/40-ზე საარჩევნო სისტემის შეთავაზების შესახებ ინფორმაცია უარყო. ამის შესახებ მან ევროკავშირის ელჩის რეზიდენციაში გამართული შეხვედრის შემდეგ ჟურნალისტებს განუცხადა.

ამავე შეხვედრიდან გამოსულმა გიორგი ვაშაძემ ჟურნალისტებს უთხრა, რომ ხელისუფლებას ახალი ვერსია აქვს - 110-40-ზე, თუმცა „ჩვენ ამას ვერ დავეთანხმებით“.

25 თებერვალს საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.

ხელისუფლებამ ოპონენტებს შერეული საარჩევნო მოდელი 100/50 2019 წლის დეკემბერში შესთავაზა. ეს საარჩევნო მოდელი გულისხმობს პროპორციული წესით 100 დეპუტატის არჩევას, ნაცვლად 77-ისა, ხოლო მაჟორიტარული მანდატები 50-მდე შემცირდება.

იმ შემთხვევაში, თუ პოზიციები არ შეიცვლება, 2020 წლის საპარლამენტო არჩევნები მოქმედი მოდელით ჩატარდება: 77 პროპორციული და 73 მაჟორიტარული.

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.