გიორგი ვაშაძე: მინდა ვუთხრა ოპოზიციის მხარდამჭერებს - მოვემზადოთ არჩევნებისთვის

მინდა ვუთხრა ოპოზიციის მხარდამჭერებს - მოვემზადოთ არჩევნებისთვის. რა სისტემით და მოდელითაც არ უნდა ჩატარდეს არჩევნები, მთავარი ამოცანაა, რომ „ქართული ოცნება“ აუცილებლად გავუშვათ ხელისუფლებიდან, - ამის შესახებ „ახალი საქართველოს“ თავმჯდომარემ, გიორგი ვაშაძემ გერმანიის ელჩის რეზიდენციაში ოთხსაათიანი შეხვედრის დასრულების შემდეგ განაცხადა.

„საკმაოდ მნიშვნელოვანი იყო ეს შეხვედრა. რამდენჯერაც ჩვენი დასავლელი პარტნიორები მიგვიწვევენ, ყველა შეხვედრაზე მივალ და მივიღებ მონაწილეობას, ვინაიდან მათ ნამდვილად აღელვებთ საქართველოს დემოკრატიული განვითარება. სხვადასხვა თემა იყო განხილული და მინდა ვუთხრა ოპოზიციის მხარდამჭერებს - მოვემზადოთ არჩევნებისთვის. რა სისტემით და მოდელითაც არ უნდა ჩატარდეს არჩევნები, მთავარი ამოცანაა, რომ „ქართული ოცნება“ აუცილებლად გავუშვათ ხელისუფლებიდან.

რაც შეეხება მანდატების გადანაწილებას, დარწმუნებული ვარ, რომ საქართველოს თითოეულ მოქალაქეს ამ ციფრებზე საუბარი უკვე ყელში ამოუვიდა. დარჩა მაქსიმუმ ერთი კვირა, რათა საკონსტიტუციო ცვლილებების ინიცირება მოხდეს და ამ ერთი კვირის განმავლობაში ყველაფერს ვნახავთ. პირადად მე ვემზადები იმისთვის, რომ დღევანდელი საარჩევნო სისტემითაც გაიმარჯვოს ოპოზიციამ.

შეხვედრაზე იყო პოლიტიკურ დევნაზეც საუბარი, საარჩევნო სისტემაზე და სხვა საკითხებზე. ჯერ არ არის ის კონდიცია, რომ მოლაპარაკებების, ამ სიტყვის სრული გაგებით, მორიგი რაუნდი გაიმართოს. მადლობა კიდევ ერთხელ გერმანიის ელჩს მასპინძლობისთვის. იმედი მაქვს, რომ საქართველოში საღი აზრი გაცილებით მეტ პოლიტიკოსს უფრო მეტი ექნება, ვიდრე პერსონალური ინტერესები“, - განაცხადა ვაშაძემ.

27 თებერვალს საპარლამენტო უმრავლესობის წევრმა, ირაკლი კობახიძემ ოპოზიციისთვის 110/40-ზე საარჩევნო სისტემის შეთავაზების შესახებ ინფორმაცია უარყო. ამის შესახებ მან ევროკავშირის ელჩის რეზიდენციაში გამართული შეხვედრის შემდეგ ჟურნალისტებს განუცხადა.

ამავე შეხვედრიდან გამოსულმა გიორგი ვაშაძემ ჟურნალისტებს უთხრა, რომ ხელისუფლებას ახალი ვერსია აქვს - 110-40-ზე, თუმცა „ჩვენ ამას ვერ დავეთანხმებით“.

25 თებერვალს საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.

ხელისუფლებამ ოპონენტებს შერეული საარჩევნო მოდელი 100/50 2019 წლის დეკემბერში შესთავაზა. ეს საარჩევნო მოდელი გულისხმობს პროპორციული წესით 100 დეპუტატის არჩევას, ნაცვლად 77-ისა, ხოლო მაჟორიტარული მანდატები 50-მდე შემცირდება.

იმ შემთხვევაში, თუ პოზიციები არ შეიცვლება, 2020 წლის საპარლამენტო არჩევნები მოქმედი მოდელით ჩატარდება: 77 პროპორციული და 73 მაჟორიტარული.

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.