ნინო ბურჯანაძე: არის მზაობა, რომ გამოსავალი ვიპოვოთ, ხოლო გამოსავლის ძიებაც უკვე მისი პოვნის საწინდარია

„დემოკრატიული მოძრაობის“ ლიდერის, ნინო ბურჯანაძის განცხადებით, ხელისუფლება და ოპოზიცია შექმნილი სიტუაციიდან გამოსავალს ეძებენ და ეს მზაობა გამოსავლის პოვნის საწინდარია. ამის შესახებ მან ჟურნალისტებს გერმანიის ელჩის რეზიდენციაში ოთხსაათიანი შეხვედრის დასრულების შემდეგ განუცხადა.

„მე ვფიქრობ, რომ საკონსტიტუტიო ცვლილებების პროექტზე შეთანხმების რესურსი არსებობს. პროცესი რთულად, მაგრამ მაინც მიდის წინ, ჩვენ ვსაუბრობთ და ვეძებთ გამოსავალს იმ ჩიხიდან, რომელშიც ახლა აღმოჩნდა არა მხოლოდ ხელისუფლება და ოპოზიცია, არამედ მთელი პოლიტიკური პროცესი. ამ მიმართულებით ინტენსიური მუშაობა გაგრძელდება. ყველას გვესმის, რომ ცოტა დროა დარჩენილი და ამ დროში შეთანხმება უნდა შედგეს და პოლიტიკური პროცესი სხვა რეალობაში გადავიდეს. მადლობა ელჩებს ამ ძალისხმევისთვის, მათაც ძალიან კარგად ესმით, რომ სტაბილურობის და დემოკრატია განტმტკიცებას საჭიროებს. ​ნამდვილად არის მზაობა, რომ გამოსავალი ვიპოვოთ. კარგი იქნებოდა, რომ აქამდე არ მისულიყო საქმე, მაგრამ გამოსავლის ძიებაც უკვე მისი პოვნის საწინდარია“, - აცხადებს ბურჯანაძე.

27 თებერვალს საპარლამენტო უმრავლესობის წევრმა, ირაკლი კობახიძემ ოპოზიციისთვის 110/40-ზე საარჩევნო სისტემის შეთავაზების შესახებ ინფორმაცია უარყო. ამის შესახებ მან ევროკავშირის ელჩის რეზიდენციაში გამართული შეხვედრის შემდეგ ჟურნალისტებს განუცხადა.

ამავე შეხვედრიდან გამოსულმა გიორგი ვაშაძემ ჟურნალისტებს უთხრა, რომ ხელისუფლებას ახალი ვერსია აქვს - 110-40-ზე, თუმცა „ჩვენ ამას ვერ დავეთანხმებით“.

25 თებერვალს საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.

ხელისუფლებამ ოპონენტებს შერეული საარჩევნო მოდელი 100/50 2019 წლის დეკემბერში შესთავაზა. ეს საარჩევნო მოდელი გულისხმობს პროპორციული წესით 100 დეპუტატის არჩევას, ნაცვლად 77-ისა, ხოლო მაჟორიტარული მანდატები 50-მდე შემცირდება.

იმ შემთხვევაში, თუ პოზიციები არ შეიცვლება, 2020 წლის საპარლამენტო არჩევნები მოქმედი მოდელით ჩატარდება: 77 პროპორციული და 73 მაჟორიტარული.

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.