ლადო ბოჟაძე: ერთადერთი პოლიტიკური ძალა, რომელსაც შერეული საარჩევნო სისტემის შენარჩუნება აწყობს „ნაციონალური მოძრაობაა“

არსებული საარჩევნო სისტემის შენარჩუნება „ნაციონალურ მოძრაობას“ აწყობს, - ამის შესახებ ანალიტიკოსმა ლადო ბოჟაძემ გადაცემა „დღის ქრონიკაში“ განაცხადა. მისი თქმით, ეს მათ არჩევნების შედეგების გაპროტესტების საფუძველს მისცემს.

„ერთადერთი პოლიტიკური ძალა, რომელსაც აწყობს დარჩეს შერეული საარჩევნო სისტემა და კონფიგურაცია 77/73-ზე არის სწორედ „ნაციონალური მოძრაობა“, რადგან მათ ექნებათ სრული საფუძველი მთელი წინასაარჩევნო პერიოდის განმავლობაში ისაუბრონ იმაზე, რომ არსებული საარჩევნო სისტემა არის უსამართლო, არალეგიტიმური და ნებისმიერი შედეგი, რომელიც შეიძლება დადგეს 31 ოქტომბერს, იქნება მათთვის მიუღებელი. ვგულისხმობ იმას, რომ თუ „ქართული ოცნება“ მოიგებს ამ არჩევნებს და მოიგებს ნამდვილად, ეს იქნება არა ქართველი ხალხის გადაწყვეტილება და არჩევანი, არამედ სისტემის დამსახურება, ამიტომაც ყველა საბაბი ექნებათ არჩევნების შემდგომ პერიოდში, პირველივე ნოემბრიდან დაიწყონ დესტაბილიზაციის, არეულობის მცდელობა და ქაოსი“, - განაცხადა ბოჟაძემ.

მისივე თქმით, „ნაციონალური მოძრაობის“ მიზანი დიალოგის ჩაშლაა, ამიტომ „ქართულმა ოცნებამ“ თავისი ინიციატივა საკონსტიტუციო ცვლილების პროექტად უნდა გადააქციოს და პარლამენტში წარადგინოს.

„ჩვენ ვხედავთ, რომ „ნაციონალური მოძრაობა“ ყველაფერს აკეთებს, რათა კომპრომისი არ შედგეს და შედეგი არ დაიდოს. რა კონფიგურაციაზეც არ უნდა იყოს საუბარი, მინდა დაგარწმუნოთ, რომ „ნაციონალური მოძრაობა“ ყველაფერს გააკეთებს, რომ დიალოგი არ შედგეს. ამიტომ გამოსავალი არის ერთი, რომ „ქართული ოცნება“ უნდა დაელოდოს ოპოზიციასთან კიდევ ერთ დიალოგს, კიდევ ერთ კომპრომისს, რადგან ეს არის უბრალოდ აუცილებელი და საჭირო ჩვენი ქვეყნის მომავალი განვითარებისთვის. მაგრამ ცალსახად, „ქართულმა ოცნებამ“ საკუთარი ინიციატივა უნდა გადააქციოს საკონსტიტუციო ცვლილებების პროექტად და წარადგინოს პარლამენტში“, - აღნიშნა ანალიტიკოსმა.

მისივე თქმით, „ქართულმა ოცნებამ“ ბუნებრივი ბარიერი უნდა შემოიღოს, რომ სხვა პოლიტიკურ პარტიებს ჰქონდეთ საშუალება დამოუკიდებლად მიიღონ მონაწილეობა და მოხვდნენ პარლამენტში და არ დაექვემდებარონ „ნაციონალური მოძრაობის“ შანტაჟს.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა.