არჩილ თალაკვაძე ოპოზიციასთან მოლაპარაკებებზე: დღეის მონაცემებით, შეთანხმება ობიექტურად შესაძლებელია

მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, - ამის შესახებ პარლამენტის თავმჯდომარემ, არჩილ თალაკვაძე „ქართული ოცნების“ ოფისში უმრავლესობის სხდომის შემდეგ განაცხადა.

„ჩვენ დღეს გვქონდა საპარლამენტო უმრავლესობასთან სამუშაო შეხვედრა, რომელსაც ესწრებოდა პარტიის თავმჯდომარე. განვიხილეთ მიმდინარე მოლაპარაკებების ყველა მთავარი საკითხი. ჩვენ გუნდი ამომწურავად ჩავაყენეთ საქმის კურსში იმ ძირითად პირობებზე, რომლებიც განიხილებოდა ბოლო ერთი კვირის განმავლობაში. მინდა მადლობა გადავუხადო ჩვენი პარტნიორი ქვეყნების ელჩებს, რომლებმაც მაქსიმალურად ხელი შეუწყვეს დიალოგის გამართვას და მოლაპარაკებებს. ყველა პრინციპულ საკითხთან დაკავშირებით, იქნება ეს პროპორციები, 40%-იანი ბარიერის პრინციპი, თვითონ საარჩევნო ბარიერი და არჩევნები, რომლებიც უნდა ჩატარდეს 2020 წელს, ყველა პრინციპულ საკითხთან დაკავშირებით ჩვენი მხრიდან არის შეთავაზებული ოპოზიციის მიმართ სამართლიანი, პრაგმატული და ოპტიმალური პირობები, რომლებიც ამ პოლიტიკურ კონტექსტში, ამ მოცემულობაში შესაძლებლი იყო ხელისუფლების მხრიდან გაკეთებულიყო“, - განაცხადა თალაკვაძემ.

მისივე თქმით, ბოლო დღეებში ოპოზიციის ნაწილი ცდილობდა თავისი რაკურსით გაეშუქებინა არაფორმალური მოლაპარაკებების დეტალები.

„ამ მომენტისთვის, როგორც ჩვენი მხრიდან, ასევე ოპოზიციის მეორე მხრიდან არის ნაბიჯები გადადგმული იმისათვის, რომ შეთანხმება შედგეს. დღეის მონაცემებით, შეთანხმება ობიექტურად შესაძლებელია. იმ პოლიტიკურ პარტიას, რომელიც ხელს შეუშლის ამ შეთანხმებას და დაბლოკავს ამ შეთანხმებას, მოუწევს, რომ საზოგადოებას და ჩვენ საერთაშორისო პარტნიორებს აუხსნას, თუ რა იყო ის რეალური მიზეზები და მოტივაცია, რომელიც შესაძლოა შეთანხმების მიღწევისთვის ხელის შემშლელი გახდეს. თუ შეთანხმება სურს ოპოზიცია, ამისთვის ყველა პირობა შექმნილია. ნაბიჯები ყველა მხრიდან გადადგმულია და მე მადლობას ვუხდი ვინც იყო კონსტრუქციული ამ პროცესში, მათ შორის ოპოზიციის მხრიდან. თუ შეთანხმება სურს ოპოზიციას, ყველა პირობა არის შემქნილი. ჩვენი მხრიდან დღეს ყველა სამართლიანი, პრაგმატული და მოთხოვნილი პირობები არის დაკმაყოფილებული და ეს იცის ოპოზიციამ“, - განაცხადა თალაკვაძემ.

ბოლო კვირის განმავლობაში მმართველმა გუნდა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.