ირაკლი კობახიძე: თუ ოპოზიცია საბაბის ძებნას არ დაიწყებს, შეთავაზებული საარჩევნო მოდელი მისაღები უნდა იყოს

საპარლამენტო უმრავლესობის წევრი, ირაკლი კობახიძის განცხადებით, უმრავლესობის სხდომაზე განხილვის მთავარი თემა იყო საარჩევნო სისტემასთან დაკავშირებული მოლაპარაკებები, რომელიც ოპოზიციასთან წარმოებს.

„ჩვენ წარვადგინეთ მოდელთან დაკავშირებული პრინციპები, რაც განიხილება, თუმცა დეტალებში ვერ შევდივართ, რადგან ოპოზიციასთან გვაქვს შეთანხმება და ისინიც არ შედიან დეტალებში. მთავარი პრინციპი რჩება უცვლელი - პარტია, რომელიც აიღებს 40-ზე მეტს, ან ნაკლებს, ვერ ჩამოაყალიბებს მთავრობას ერთპარტიულად“, - აღნიშნა ირაკლი კობახიძემ.

მისივე თქმით, მაგალითად, თუ „ქართული ოცნება“ აიღებს 40 %-ს და არა მეტს, მას ექნება არაუმეტეს 75 მანდატისა და იქნება საჭირო კოალიციის ფორმირება.

„იმისთვის, რომ ჩვენ, სესიის ბოლომდე მოვასწროთ მთლიანი პაკეტის მიღება, იგულისხმება როგორც საკონსტიტუციო ცვლილებები, ასევე საარჩევნო კოდექსში შესატანი ცვლილებები, მაქსიმალური ინიცირების ვადა არის შემდეგი ოთხშაბათი, რაც ნიშნავს იმას, რომ მომდევნო ორშაბათს (ერთი კვირის შემდეგ) უნდა მივაღწიოთ შეთანხმებას“, - განუცხადა ჟურნალისტებს ირაკლი კობახიძემ.

„ქართული ოცნების“ აღმასრულებელი მდივნის თქმით, ოპოზიციასთან შეხვედრები უნდა გაგრძელდეს.

„თუ ოპოზიცია საბაბის ძებნას არ დაიწყებს, ეს მოდელი მისაღები უნდა იყოს, რადგან მაქსიმალურად არის დაახლოებული პროპორციულ საარჩევნო სისტემასთან და ის პრინციპი არის დაცული, რასაც ოპოზიცია ითხოვდა: 40 ან ნაკლები პროცენტის მქონე პარტიას არ უნდა ჰქონოდა მთავრობის ჩამოყალიბების უფლება“, - აღნიშნა ირაკლი კობახიძემ.

„ქართული ოცნების“ ოფისში უმრავლესობის სხდომა პარტიის ლიდერის ბიძინა ივანიშვილის ხელმძღვანელობით ჩატარდა.

ბოლო კვირის განმავლობაში მმართველმა გუნდა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.