არჩილ თალაკვაძე: რუსული ოკუპაცია საფრთხეს უქმნის ჩვენს დემოკრატიას, რაც განსაკუთრებით აქტუალურია არჩევნების წლებში

რუსეთის მიერ ჩვენი მიწების მიმდინარე ოკუპაცია საფრთხეს უქმნის ჩვენს დემოკრატიას, რაც განსაკუთრებით აქტუალურია არჩევნების წლებში, - ამის შესახებ გამოცემა Morning Consult-ში გამოქვეყნებულ სტატიაში საქართველოს პარლამენტის თავმჯდომარე, არჩილ თალაკვაძე წერს.

მისივე თქმით, ისევე, როგორც მზარდი დემოკრატიის ბევრ ქვეყანაში, საქართველოშიც მიმდინარეობს ცხარე დებატები ქვეყნის პოლიტიკური პროცესების ხასიათის შესახებ და ეს დებატები წარმოადგენს თავისუფალი საზოგადოების სავიზიტო ბარათს. თალაკვაძის განცხადებით, საქართველოსთვის საბედნიეროდ, მას ჰყავს ისეთი მეგობრები, როგორიცაა აშშ, რომლებიც იზიარებენ ხედვას საქართველოს, როგორც თავისუფალი, დამოუკიდებელი, სუვერენული და დემოკრატიული სახელმწიფოს შესახებ.

„საქართველოს მტკიცე გადაწყვეტილება შემოდგომაზე კიდევ ერთი თავისუფალი, გამჭვირვალე და დემოკრატიული არჩევნების ჩატარებასთან დაკავშირებით წარმოადგენდა ვაშინგტონში ჩემი ბოლო ვიზიტის დროს კონგრესის ლიდერებთან და ტრამპის ადმინისტრაციის ოფიციალურ წარმომადგენლებთან გამართული დისკუსიების მთავარ თემებს. მე მკაფიოდ გავაჟღერე ჩვენი შეშფოთება უსაფრთხოებასთან დაკავშირებით, რომელიც ეხება რუსეთის მხრიდან ჩვენს პოლიტიკურ პროცესებში მოსალოდნელი ჩარევას. არჩევნებთან დაკავშირებით მზაკვრული მოქმედებისთვის რუსეთს ფართო შესაძლებლობები აქვს, მათ შორის ჩვენი დემოკრატიული პროცესების წარმართვის გზით იმ ღირებულებების წინააღმდეგ, რომელთაც ჩვენ ვუერთგულებთ და ვიზიარებთ ჩვენს დასავლელ პარტნიორებთან ერთად.

საქართველოში მიმდინარეობს ცხარე დებატები სრული პროპორციული საარჩევნო სისტემის შემოღების დროსთან დაკავშირებით. 2012 წლამდე არც ერთ ხელისუფლებას არ უცდია სრულ პროპორციულ სისტემაზე გადასვლა და არც ერთს, ჩვენი ხელისუფლების გარდა, არ გაუკეთებია და არ შეუსრულებია დაპირება 100-იან პროპორციულ წარმომადგენლობაზე გადასვლასთან დაკავშირებით. „ქართულმა ოცნებამ“ დადო პირობა სრულ პროპორციულ სისტემასთან დაკავშირებით და მხარი დაუჭირა კიდეც ამისთვის აუცილებელ საკონსტიტუციო ცვლილებას. ჩვენ შევასრულეთ ჩვენი დაპირება და, ჩვენ მიერ მიღებული საკონსტიტუციო ცვლილებების შესაბამისად, სრულ პროპორციულ სისტემაზე გადასვლა მოხდება 2024 წელს“, - წერს თალაკვაძე.