ბადრი ჯაფარიძე: გიგი უგულავას განცხადება არის სახელმწიფოებრივი და პასუხისმგებლიანი მიდგომა

პარტია „ლელო საქართველოსთვის” ერთ-ერთი ლიდერი, ბადრი ჯაფარიძე გიგი უგულავას განცხადებას სახელმწიფოებრივსა და პასუხისმგებლიანს უწოდებს. მისი თქმით, საქართველოს ახლა მშვიდი გარემო სჭირდება და პროპორციულ საარჩევნო სისტემასთან მაქსიმალურად მიახლოებული მოდელის მისაღებად ყველაფერი უნდა გაკეთდეს.

პარტია „ლელოს“ ლიდერი ასევე პროცესებში საერთაშორისო საზოგადოებისა და დასავლელი პარტნიორების მაღალი ჩართულობის აუცილებლობაზე საუბრობს და აცხადებს, რომ პასუხისმგებლიანმა ოპოზიციამ უცხოელი პარტნიორების პოზიცია უნდა გაითვალისწინოს და კომპრომისული პოზიცია დაიკავოს მოლაპარაკებების პროცესებში.

“ეს არის სახელმწიფოებრივი და პასუხისმგებლიანი მიდგომა იმიტომ, რომ დღეს ჩვენს ქვეყნას სჭირდება მშვიდი გარემო. იმ პირობებში, როდესაც ხელისუფლება მანდატებით ვაჭრობს, გვჭირდება, რომ მაქსიმალურად მივიღოთ პროპორციულთან მიახლოებული სისტემა. ჩვენთვის, როგორც პასუხისმგებლიანი ოპოზიციისთვის მთავარია, რომ მაქსიმალურად გავითვალისწინოთ ჩვენი დასავლელი პარტნიორებისა და მეგობრების მოსაზრებები, მათი რეკომენდაციები, წინადადებები და აქედან გამომდინარე ოპოზიციამ უნდა დაიკავოს მაქსიმალურად კომპრომისული პოზიცია. ხაზგასმით მინდა აღვნიშნო, რომ ჩვენი ამერიკელი და ევროპელი პარტნიორების პოზიციის გათვალისწინებით. ეს ხელისუფლება პოლიტიკურ დევნასა და პოლიტიკურ პარტიებს არ აღიარებს ისევე, როგორც ამას აკეთებდნენ საბჭოთა კავშირის დროს, მაგრამ ჩვენ მაქსიმალურად უნდა გამოვიყენოთ საერთაშორისო ჩართულობა, მნიშვნელოვანია ევროსაბჭოს მიერ მისიის მოვლენა საქართველოში, რომელმაც ამ შემთხვევებზე უნდა შეისწავლოს ყველა გარემოება.” - აცხადებს ბადრი ჯაფარიძე.

დედაქალაქის ყოფილმა მერმა, გიგი უგულავამ „ფეისბუქზე“ დაწერა, რომ არ სურს მისი გათავისუფლების საკითხი საარჩევნო სისტემაზე მოლაპარაკებებისთვის ბარიერი გახდეს.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.