დავით მათიკაშვილი: ოპოზიციის განცხადებებიდან ჩანს, რომ შეთანხმება არ უნდათ

საარჩევნო სისტემის მოდელი, რომელიც მმართველი გუნდის მიერაა შეთავაზებული, უზრუნველყოფს არჩევნების ძალიან მაღალი დემოკრატიული სისტემით ჩატარებას, - ამის შესახებ „ქრონიკას“ საპარლამენტო უმრავლესობის წევრმა, დავით მათიკაშვილმა განუცხადა.

მან ასევე აღნიშნა, რომ ოპოზიციის მხრიდან განცხადებები იმას მიუითითებს, რომ მათ შეთანხმება არ უნდათ.

„ცოტა უცნაურია ოპოზიციის განცხადებები, აქედან კარგად ჩანს, რომ მათ შეთანხმება არ უნდათ“, - აღნიშნა დავით მათიკაშვილმა.

„ევროპული საქართველოს“ წევრმა, პატიმრობაში მყოფმა გიგი უგულავამ სოციალურ ქსელ Facebook-ზე დაწერა, რომ არ სურს, მისი გათავისუფლების საკითხი მაქსიმალურად პროპორციული სისტემის მიღების პროცესში ბარიერი გახდეს.

„ქართული ოცნება“ საარჩევნო სისტემაზე საკონსტიტუციო ცვლილებების პროექტს რამდენიმე დღეში წარადგენს.

მმართველი გუნდის შეთავაზებით, გამარჯვებული სუბიექტი 40 პროცენტზე ნაკლები მხარდაჭერის შემთხვევაში 75 მანდატზე მეტის მოპოვებას ვერ შეძლებს და მთავრობას ვერ დააკომპლექტებს.

საპარლამენტო უმრავლესობის ლიდერის, მამუკა მდინარაძის განცხადებით, თუ ოპოზიცია ცოტაოდენ პასუხისმგებლობას გამოიჩენს, მხარეები შეთანხმებას მიაღწევენ, რისთვისაც საბოლოო ვადა 9 მარტია.

ოპოზიციის პოზიციაა, რომ პარტიამ მთავრობის დასაკომპლექტებლად მინიმუმ ხმების 40% მაინც უნდა მიიღოს, რაც პროპორციული წესით 130 დეპუტატის, ხოლო 20-ის კი მაჟორიტარულით არჩევას ნიშნავს.