მთავრობა თვითმმართველი ერთეულების გაერთიანების პროცედურას იწყებს

საქართველოს რეგიონული განვითარებისა და ინფრასტრუქტურის სამინისტრომ 14 თვითმმართველ ერთეულს დღეს წერილები გაუგზავნა და თვითმმართველი ქალაქებისა და სათემო მუნიციპალიტეტების გაერთიანების პროცედურების დაწყება მოსთხოვა. "ეს იმას ნიშნავს, რომ დღეს არსებული 14 მუნიციპალიტეტი, რომელთაგან 7 თვითმმართველი ქალაქია, გაუქმდება და მათგან 7 მუნიციპალიტეტი შეიქმნება", - წერს თვითმმართველობის მხარდამჭერი პროექტის ვებპლატფორმა, პორტალი droa.ge. 

გამოცემის ცნობით, მათ ხელთ არსებული დოკუმენტის თანახმად ირკვევა, რომ ხუთშაბათს, 11 მაისს, გაიმართა საქართველოს რეგიონული განვითარების სამთავრობო კომისიის სხდომა, რომელზეც ქალაქ ზუგდიდისა და ზუგდიდის თემის, ქალაქ ოზურგეთისა და ოზურგეთის თემის, ქალაქ ახალციხისა და ახალციხის თემის, ქალაქ ამბროლაურისა და ამბროლაურის თემის, ქალაქ გორისა და გორის თემის, ქალაქ თელავისა და თელავის თემის, ქალაქ მცხეთისა და მცხეთის თემის მუნიციპალიტეტების გაერთიანების საკითხი განიხილეს.

საქართველოს რეგიონული განვითარებისა და ინფრასტრუქტურის მინისტრის მოადგილემ კახაბერ გულედანმა, რომელიც, ასევე, სამთავრობო კომისიის თავმჯდომარეა, კომისიის წევრებს წარუდგინა მუნიციპალიტეტების გაერთიანების საჭიროების დასაბუთება, აგრეთვე, გაერთიანებით შესაქმნელი მუნიციპალიტეტების საზღვრები და ადმინისტრაციული ცენტრები.

დოკუმენტში, ასევე, წერია, რომ საკითხთან დაკავშირებით კომისიის არც ერთ წევრს შენიშვნა ან წინადადება არ ჰქონია. შესაბამისად, გადაწყვეტილებაც ერთხმად მიიღეს და 14 მუნიციპალიტეტის საკრებულოებს მიმართეს, მუნიციპალიტეტების გაერთიანების თაობაზე წინადადებები წარმოადგინონ.

კომისია, ასევე, მზადაა, ადგილობრივი მოსახლეობისგან და არასამთავრობო სექტორისგან მიიღოს და განიხილოს წინადადებები გორის, თელავის, ზუგდიდის, ოზურგეთის, ახალციხის, ამბროლაურის და მცხეთის მუნიციპალიტეტების შექმნის საკითხზე და განიხილოს დაინტერესებული პირების წერილობითი მოსაზრებები.

გავრცელებული ინფორმაციით, საკრებულოები გაერთიანების საკითხს კვირის ბოლომდე განიხილავენ.

თვითმმართველი ქალაქების შესაძლო გაუქმებაზე 29 მარტს 120-მა არასამთავრობო, სათემო და მედია ორგანიზაციამ საქართველოს პრემიერმინისტრს და პარლამენტის თავმჯდომარეს განცხადებით მიმართა და მოითხოვა, არ დაუშვას 7 თვითმმართველი ქალაქისთვის სტატუსის გაუქმება.