ირაკლი კობახიძე: ოპოზიციის წარმომადგენლები ამბობენ ისეთ რამეს, რაც შეხვედრაზე საერთოდ არ გაჟღერებულა

ჩვენ გვაქვს ზოგადი შეთანხმება იმასთან დაკავშირებით, რომ არც ერთი მხრიდან არ იქნება გამოყენებული ეს საკითხი პოლიტიკური მიზნებისათვის. როგორც გრძელდებოდა პროცესები საქართველოში სამართლებრივი სახელმწიფოს პრინციპის შესაბამისად, ასევე უნდა გაგრძელდეს, - ამის შესახებ „ქართული ოცნების“ ერთ-ერთმა ლიდერმა, ირაკლი კობახიძემ დღეს გამართულ პრესკონფერენციაზე განაცხდა.

მისი თქმით, საქართველოში არიან დამოუკიდებელი ორგანოები, რომლებიც პასუხისმგებელი არიან გამოძიებაზე, შემდეგ სასჯელის შეფარდებაზე. კობახიძის განცხადებით, უნდა გაგრძელდეს ეს პროცესი, რადგან სამართლებრივი სახელმწიფოს პრინციპი არის ამოსავალი წერტილი.

„ერთ მთავარ პრინციპზე უნდა შევთანხმდეთ - საქართველში პოლიტპატიმრები არ არიან. პოლიტპატიმარს ვერც ერთ შემთხვევაში ვერ ვუწოდებთ ისეთ ადამიანს, რომელსაც აქვს მოპარული ათეულობით მილიონი ლარი საჯარო ბიუჯეტიდან. და ვერ ვუწოდებთ პოლიტპატიმარს ისეთ პირებს, რომლებიც იჭრებოდნენ პარლამენტის შენობაში. ერთ მარტივ პრინციპზე უნდა შევთანხმდეთ, როდესაც ადამიანი არის მხილებული თუნდაც მსუბუქ დანაშაულში, ის უნდა გავიდეს პოლიტიკიდან. ეს არის უმარტივესი პრინციპი, რომელიც მოქმედებს ყველა ევროპულ ქვეყანაში. საქართველოში ეს პრინციპი სამწუხაროდ, არ მოქმედებს, რაც ნიშნავს იმას, რომ ბოლომდე პოლიტიკური კულტურა ქვეყანაში ჩამოყალიბებული არ არის“, - განაცხადა კობახიძემ.

ის „ახალი საქართველოს“ ლიდერის, გიორგი ვაშაძის განცხადებას გიგი უგულავას გათავისუფლების შესახებ შეთანხმებაზე ტყუილს უწოდებს. „ოპოზიციის კონკრეტული წარმომადგენლები, ტყუილს ამბობენ. ამბობენ ისეთ რამეს, რაც საერთოდ არ გაჟღერებულა შეხვედრაზე. თქვენ მოისმინეთ გიორგი ვაშაძის კომენტარი, ეს ადამიანი მანამდეც შეიმჩნეოდა ტყუილებში. ახლაც თქვა ტყუილი. ის ხშირად იტყუება ზოგადად, ეს არის მისი სტილი. ამ შემთხვევაშიც მან მოიტყუა, როდესაც თქვა, რომ კონკრეტული ადამიანის შეწყალებაზე, ან გამოძიების შეწყვეტაზე იყო საუბარი. ეს არ იყო ინტერპრეტაცია, ეს იყო ტყუილი“, - განაცხადა ვაშაძემ.

ოპოზიცია და ხელისუფლება 2020 წლის არჩევნების 120/30-ზე მოდელით ჩატარებაზე შეთანხმდა.

გასული წლის დეკემბერსა და მიმდინარე წლის იანვარში ოპოზიციისა და „ქართული ოცნების“ წარმომადგენლებმა დიპლომატიური კორპუსის ჩართულობით რამდენიმე შეხვედრა გამართეს და საარჩევნო სისტემის რამდენიმე მოდელი განიხილეს, თუმცა საბოლოო შეთანხმებას მხოლოდ ახლა მიაღწიეს.

საარჩევნო სისტემაზე მხარეების მიერ მიღწეული შეთანხმების შესახებ საკანონმდებლო ინიციატივას პარლამენტის ბიუროზე 11 მარტს გაიტანენ.