ნუკრი ქანთარია: ნუ არიან თანამდებობების გადანაწილების პროცესში, მერე იმედგაცრუებამ იცის დეპრესია, სტრესი, აგრესია და ცუდი სიმპტომები

ერთი რამ უნდა ითქვას მკაფიოდ, ვერც ერთი მმართველი პარტია ვერც ვერავის დაიჭერს და ვერც ვერავის გაუშვებს. მინდა, რომ ეს გზავნილი მკაფიო იყოს საზოგადოებისთვის და ნუ არის ამის ინტერპრეტაციები, - ამის შესახებ საპარლამენტო უმრავლესობის წევრმა, ნუკრი ქანთარიამ ბიუროს სხდომაზე განაცხადა.

„შეთანხმება ცუდი არასდროს არის. იმედი მინდა გამოვთქვა, რომ ეს პოლიტიკური ჰაი-ჰუი, გნიასი, რომელსაც ასე გულმოდგინედ ეწეოდნენ, გაჩერდება. ეს პოლიტიკური თაიგული, ეგრეთ წოდებული ოპოზიციური თუ წოდებული, ამ ოპოზიციური კონის ფასი ჩვენმა საზოგადოებამ კარგად იცის. მე მინდა ვუთხრა მათ, რომ ნუ არიან თანამდებობების გადანაწილების პროცესში, გუშინ მე უკვე რაღაც მსგავსი ვნახე. მერე იმედგაცრუებამ იცის დეპრესია, სტრესი, აგრესია და ცუდი სიმპტომები“, - განაცხადა ქანთარიამ.

ოპოზიცია და ხელისუფლება 2020 წლის არჩევნების 120/30-ზე მოდელით ჩატარებაზე შეთანხმდა. ამის შემდეგ „ახალი საქართველოს“ ლიდერმა, გიორგი ვაშაძემ განაცხადა, რომ შეთანხმება უახლოეს მომავალში, 20 ივნისის შემდეგ დაკავებული ყველა „პოლიტიკური პატიმრის“, მათ შორის გიგი უგულავას გათავისუფლებას ითვალისწინებს. მმართველი გუნდის წევრები კი აღნიშნულთან დაკავშირებით რამე შეთანხმების არსებობას უარყოფენ.