ნინო ბურჯანაძე: ოპოზიციისა და ხელისუფლების შეთანხმება არჩევნებზე უსაფრთხო გარემოს უზრუნველყოფს

„ერთიანი საქართველო - დემოკრატიული მოძრაობის“ ლიდერი ნინო ბურჯანაძე ოპოზიციასა ხელისუფლებას შორის საარჩევნო სისტემაზე მიღწეულ შეთანხმებას საერთო გამარჯვებად აფასებს. „ეს არის საერთო გამარჯვება ქვეყნისთვის არის კარგი და უზრუნველყოფს არჩევნებზე უსაფრთხო გარემოს“, - ამის შესახებ ბურჯანაძემ ტელეკომპანია „იმედის“ გადაცემა „დღის ქრონიკაში“ განაცხადა.

„კმაყოფილი ვარ გუშინდელი შეთანხმებით. როცა არაფორმალურ შეხვედრებზე გამოჩდნენ არჩილ თალაკვაძე და ირაკლი კობახიძე შეთანხმების სურვილი ამ შეხვედრებზე გამოჩნდა.ბუნებრივია ისინი თავისი გუნდის პოზიციას მკვეთრად იცავდნენ. შეიძლება გქონდეს მკვეთრი პოზიცია, მაგრამ გქონდეს სურვილი, რომ მოლაპარაკება შედგეს. შეუფასებელია ის წვლილი რომელიც ითამაშეს უცხოელმა პარტნიორებმა. როგორც ელჩებმა, ისე სენატის და კონგრესის. ევროსაბჭოს და ევროპარლამენტის წარმომადგენლებმა. ძალიან მნიშვნელოვანია როლი ამ უპრეცედენტო ერთობის. რომ არა ეს ერთობა „ქართული ოცნება“ დათმობაზე არ წამოვიდოდა. გუშინდელმა შეთანხმება ეს არის საერთო გამარჯვება. ქვეყნისთვის არის კარგი და უზრუნველყოფს არჩევნებზე უსაფრთხო გარემოს“, - განაცხადა ბურჯანაძემ.

მისი თქმით დღეისთვის ეს განცდა ყველა ოპოზიციურ პარტიას აქვს, რომლებიც „ლეიბორისტული პარტიის“ ოფისში იყო შეკრებილი. „ამას მოწმობს თუნდაც 4 აპრილის აქცია, რომელიც გადაიდო. დღეს ქვეყანაში კორონავირუსის საფრთხე რეალურია. არ გვინდა ქვეყანას პრობლემები და ადამიანებს საფრთხე შევუქმნათ. შეთანხმება მიღწეულია და ეს აქცია გაურკვეველი დროით არის გადადებული. ჩვენი თვითმიზანი აქციების ჩატარება არ არის. თუ ხელისუფლება ამ დანაპირებს შეასრულებს, არავის არ უხარია აქციებზე დღე და ღამე დგომა. შეიძლება ცალკეული ადამიანები არიან ვისაც ვითარების გამწვავება სურს, მაგრამ ძირითად შემადგენლობას ამის სურვილი არ აქვს“. - აღნიშნა ბურჯანაძემ.

მისი თქმით მეორე საკითხი არის „პოლიტიკური ჩრდილის“ მქონე საქმეები.„ჩვენ ვერ შევთანხმდით ქვეყანაში პოლიტპატიმრები არიან თუ არა. ხელისუფლება თვლის რომ არ არიან, ოპოზიცია თვლის რომ არიან.როდესაც 2013 წელს გიგი უგულავა დააპატიმრეს, მე ის არ ჩამითვლია პოლიტპატიმრად. მაგრამ 8 წლის შემდეგ, როცა ადამიანს იმავე საქმეზე აპატიმრებ რომელზეც იჯდა, რვა წელია იცი ეს დანაშაული და ახლა ედავები მხოლოდ იმიტომ რომ დღეს ის აქტიური პოლიტიკური ლიდერია, ეს უკვე არის პოლიტიკური დევნა“, - აღნიშნა ბურჯანაძემ.

ოპოზიცია და ხელისუფლება 2020 წლის არჩევნების 120/30-ზე მოდელით ჩატარებაზე შეთანხმდა. ამის შემდეგ „ახალი საქართველოს“ ლიდერმა, გიორგი ვაშაძემ განაცხადა, რომ შეთანხმება უახლოეს მომავალში, 20 ივნისის შემდეგ დაკავებული ყველა „პოლიტიკური პატიმრის“, მათ შორის გიგი უგულავას გათავისუფლებას ითვალისწინებს. მმართველი გუნდის წევრები კი აღნიშნულთან დაკავშირებით რამე შეთანხმების არსებობას უარყოფენ.