თამარ ჩუგოშვილი: ასეთი სახის დოკუმენტში კონკრეტული გვარები ვერ ჩაიწერებოდა

დამოუკიდებელი დეპუტატის, თამარ ჩუგოშვილის განცხადებით, საზოგადოება კონკრეტულ საქმეებზე, ან მართლმსაჯულების პროცესზე გარკვეული ნაბიჯებისა და ქმედებების განხორციელებას უნდა ელოდოს, რომელიც ქვეყანაში პოლიტიკურ კრიზისს ან დაძაბულობას ქმნის. ჟურნალისტებთან საუბრისას თამარ ჩუგოშვილმა ყურადღება საკონსტიტუციო ცვლილებებსა და პოლიტიკურ მხარეებს შორის შეთანხმებაზე გაამახვილა. დეპუტატის ინფორმაციით, მოლაპარაკებების პროცესში საუბარი ორ თემაზე იყო და შემთხვევითი არ არის, რომ ხელმოწერა ორ დოკუმენტზე შედგა.

„ერთი დოკუმენტი არის საარჩევნო სისტემასთან დაკავშირებული და ამ თვალსაზრისით კითხვები და გაუგებრობები არ არის, რადგან ძალიან მკაფიოდ და ნათლად წერია ის პირობები, რაზეც შეთანხმება შედგა. მეორე ნაწილი დაკავშირებულია სისხლის სამართლის საქმეებთან და მართლმსაჯულებასთან. ჩემთვის გასაკვირი არ არის, რომ ან საკითხმა გარკვეული ბუნდოვანება გამოიწვია.
ამ დოკუმენტის ხელმოწერა იმან განაპირობა, რომ მოლაპარაკებების პროცესში ოპოზიციის მხრიდან საარჩევნო სისტემასთან ერთად, საუბარი იყო კონკრეტულ სისხლის სამართლის საქმეებზე. მათი მხრიდან აქცენტი კეთდებოდა იმაზე, რომ შეთანხმება ვერ მოხდებოდა, თუ გადაწყვეტილება არ იქნებოდა მიღებული. ასეთი სახის დოკუმენტში კონკრეტული გვარების ჩაწერა ვერ მოხდებოდა და ეს გამორიცხულია. საქმე დიპლომატებთან გვქონდა და ვიცით, რომ დიპლომატიური ენა თავისი სპეციფიკით ხასიათდება. ასევე, არ მიკვირს, როცა უმრავლესობის განცხადებებს ვისმენ, რადგან ჩემთვის ესეც გასაგებია. ხელისუფლების წევრები ისეთ განცხადებებს ვერ გააკეთებენ, რომელიც გულისხმობს, რომ კონკრეტული პირი ან უნდა გამოვიდეს ციხიდან, ან შევიდეს.

ძალიან მოკლე ჩანაწერია, რომელსაც ყველამ ხელი მოვაწერეთ და რაც გულისხმობს შემდეგს - გადადგმული უნდა იყოს ნაბიჯები და უნდა განხორციელდეს კონკრეტული ქმედებები იმ საქმეებთან დაკავშირებით, რომლებზეც მართლმსაჯულება ხორციელდება და რომლებიც საარჩევნო პროცესს ჩრდილს აყენებს. ანუ, იმ საქმეებთან დაკავშირებით, რომლებიც შეფასდა, როგორც პოლიტიკური სარჩულის მქონე, ან რომლებმაც განსაკუთრებული დაძაბულობა შემოიტანა საარჩევნო თემასთან დაკავშირებულ პროცესებში. ამ თვალსაზრისით გარკვეული ნაბიჯები უნდა იყოს გადადგმული. ეს ნაბიჯები საჯაროდ გადადგმული ვერ იქნება პარლამენტიდან და პარტიიდან, ნაბიჯები უნდა გადადგას პროკურატურამ, სასამართლომ და ერთ კონკრეტულ შემთხვევაში პრეზიდენტმა. ველოდები, რომ ასეთი ქმედებები საქმეში უნდა დავინახოთ“, - აღნიშნავს დეპუტატი.

ამასთან, ჩუგოშვილის მოსაზრებით, თუ ისევ იქნება მცდელობა, რომ ელჩების ხელმოწერილი პირობები არ შესრულდეს, ეს მმართველ გუნდს უკიდურესად მძიმე მდგომარეობაში ჩააყენებს.

„კონკრეტულ საქმეებზე, ან მართლმსაჯულების პროცესზე, რომელიც პოლიტიკურ კრიზისს ან დაძაბულობას ქმნის, გარკვეულ ნაბიჯებსა და ქმედებებს უნდა ველოდოთ. რა თქმა უნდა, დოკუმენტში გვარები არ ეწერებოდა. იმის სივრცე აღარ არის, რომ ვინმე რამეზე არ წამოვიდეს, რადგან ეს ყველაფერი გუშინ გადაწყდა და განსაკუთრებულ გაუგებრობებს არ ველოდები. პოლიტიკოსობა იმუნიტეტს არ ნიშნავს, პირიქით, ათმაგი ზედამხედველობისა და კონტროლის ქვეშ უნდა იყო, მაგრამ საქმე იმაშია, რომ მართლმსაჯულება ბოროტად არ უნდა იყოს გამოყენებული პოლიტიკური ოპონენტების მიმართ. როცა საარჩევნო წელს აღმოჩნდება, რომ ყველა პოლიტიკურ ოპონენტს სისხლის სამართლის დანაშაულს ედავები, ამას დამაჯერებლად ვერ აკეთებ და თან ამას იმ მოსამართლეების მიერ აკეთებ, რომლებიც ცოტა ხნის წინ აირჩიე, სიმართლეში ვეღარავის დააჯერებ და ნდობა ინსტიტუტების მიმართ ვერ იარსებებს. სწორედ ამიტომ არ შეიძლებოდა ამ მოსამართლეების არჩევა და ისეთი საქმეების ამოწევა, სადაც აშკარა ხარვეზია. ზუსტად პოლიტიკოსებს ასმაგად უნდა მოეთხოვოთ, მაგრამ ყველაფერი სამართლიანი სასამართლოს პირობებში უნდა მოხდეს და ხელისუფლებამ ეს ყველაფერი ისე არ უნდა გააკეთოს, რომ თავის სიმართლეში ვერავის დარწმუნება შეძლოს“, - განაცხადა ჩუგოშვილმა.

ოპოზიცია და ხელისუფლება 2020 წლის არჩევნების 120/30-ზე მოდელით ჩატარებაზე შეთანხმდა. ამის შემდეგ „ახალი საქართველოს“ ლიდერმა, გიორგი ვაშაძემ განაცხადა, რომ შეთანხმება უახლოეს მომავალში, 20 ივნისის შემდეგ დაკავებული ყველა „პოლიტიკური პატიმრის“, მათ შორის გიგი უგულავას გათავისუფლებას ითვალისწინებს. მმართველი გუნდის წევრები კი აღნიშნულთან დაკავშირებით რამე შეთანხმების არსებობას უარყოფენ.