დიმიტრი ხუნდაძე: საარჩევნო სისტემა არის იმგვარი, რომ მაქსიმალურად იყოს დაზღვეული ქვეყნის სტაბილური განვითარება

რა თქმა უნდა შეთანხმება სჯობს შეუთანხმებლობას. ერთიც და მეორეც უნდა ემსახურებოდეს ქვეყნის ინტერესებს. თუ ქვეყნის ინტერესები დგას საფრთხის ქვეშ, შეიძლება ​შეუთანხმებლობასაც ჰქონდეს გამართლება, - ამის შესახებ ფრაქცია, „ქართული ოცნების“ წევრმა, დიმიტრი ხუნდაძემ „დღის ქრონიკის“ ეთერში ისაუბრა.

„როცა ჩვენ დავინახეთ ეს რისკები, მაჟორიტარებმა და არა მხოლოდ მაჟორიტარებმა, სრულიად შეგნებულად ჩავაგდეთ ის კანონპროექტი, რომელიც საფრთხეს უქმნიდა ქვეყნის სტაბილურ განვითარებას. ამიტომ ჩვენი მოთხოვნა იყო, რა თქმა უნდა ის, რაც ვახსენე, პირველი და მნიშვნელოვანი და მეორე ამომრჩეველი არ უნდა დაშორებოდა უშუალო წარმომადგენელს საკუთარ პარლამენტში, ანუ მას ჰყოლოდა მაჟორიტარი რომელსაც თავად აირჩევდა, პარტიულ კულისებს მიღმა. ასევე მნიშვნელოვანი იყო ჩვენი მოთხოვნა, როდესაც დავაყენეთ საკითხი იმ საკონსტიტუციო ჩანაწერის შეცვლასთან დაკავშირებით, რომელიც გულისხმობდა 2020-ის არჩევნების შემდგომი არჩევნების ჩატარებას პროპორციული სისტემით. ეს ჩანაწერი აძლევდა საბაბს დესტრუქციულ ოპოზიციას, რომ ქუჩაში ყოფილიყო. ამიტომ ჩვენი მაშინდელი შეუთანხმებლობა, რომელმაც გარკვეულწილად გამოიწვია ხმაური, ჩვენ ესეც ვთქვით, რომ სჯობს მოკლევადიანი ხმაური და შემდეგ გრძელვადიანი სტაბილურობა ქვეყნისა. დღეს სწორედ ამიტომ გამოვთქვამ კმაყოფილებას, რომ ჩვენ ჩვენს მიზანს მივაღწიეთ. ერთი ის, რომ საარჩევნო სისტემა არის იმგვარი, რომ მაქსიმალურად იყოს დაზღვეული ქვეყნის სტაბილური განვითარება. შეიძლება უკეთ ყოფილიყო დაზღვეული იმ შერეული სისტემით, რაც აქამდე იყო, მაგრამ დღეს ეს მექანიზმები მაინც მაქსიმალურ გარანტიას იძლევა“, - განაცხადა ხუნდაძემ.

ოპოზიცია და ხელისუფლება 2020 წლის არჩევნების 120/30-ზე მოდელით ჩატარებაზე შეთანხმდა.