არჩილ თალაკვაძე: კონსენსუსის მიღწევამ აჩვენა, რომ საქართველო დემოკრატიის შემდგომი გაძლიერებისთვის მზად არის

მმართველ გუნდსა და ხელისუფლებას შორის საარჩევნო სისტემაზე შეთანხმების მიღწევამ საქართველოს პოლიტიკური სისტემის მდგრადობა დაამტკიცა, - ამის შესახებ პარლამენტის თავმჯდომარემ გადაცემა „SWOT-ანალიზში“ განაცხადა. არჩილ თალაკვაძის თქმით, კონსენსუსის მიღწევამ აჩვენა, რომ საქართველო დემოკრატიის შემდგომი გაძლიერებისთვის მზად არის.

„ეს იყო ნამდვილად ძალიან მნიშვნელოვანი შეთანხმება. მე ვფიქრობ, ბევრს პოპკორნიც ჰქონდა უკვე მომარაგებული, ელოდნენ შემდგომ ბლოკბასტერებს და ამ ადამიანებს იმედი გაუცრუვდათ. გუშინ, დღეს, ხვალაც ნახავთ ეთერებში, გამოჩნდებიან ეს ადამიანები და პირდაპირ იცნობიან სახეზეც და საუბარშიც. მე ვფიქრობ, საბოლოო ჯამში ამ გადაწყვეტილებით მოიგო საქართველომ, მოიგო ჩვენმა საზოგადოებამ, მოიგო ხელისუფლებამ, რადგან ჩვენ, ყველამ ერთად ვაჩვენეთ, რომ საქართველო მზად არის დემოკრატიის შემდგომი გაძლიერებისთვის და საქართველოს შეუძლია კომპრომისული, დემოკრატიული გადაწყვეტილებების მიღწევა პოლიტიკური სისტემის შიგნი. 2020 წლის ჩატარება დემოკრატიულად, ამ კონსენსუსის შედეგი იყო ის, რაც ჩვენ ქვეყანას სჭირდებოდა“, - განაცხადა თალაკვაძემ.

პარლამენტის თავმჯდომარის თქმით, საქართველოში პოლიტიკური სისტემის მოშლა მხოლოდ რუსეთის ინტერესების გამტარ ძალებს აწყობს.

„რეალურად საქართველოში პოლიტიკური სისტემის მოშლა, მისი დანაწევრება, დასუსტება, მისი უუნარობა, რომ პოლიტიკური გადაწყვეტილებები მიიღოს და პოლიტიკურმა პარტიებმა თვითონ შეძლონ ერთმანეთთან საუბარი და გადაწყვეტილებების მიღება, რა თქმა უნდა, ამ ყველაფრის დასუსტება აწყობს ქვეყანაში მხოლოდ იმ ძალებს, ვინც ემსახურებიან რუსეთის ინტერესებს საქართველოში, ვინაიდან ჩვენი დემოკრატიის დასუსტება შედის მხოლოდ და მხოლოდ იმ ქვეყნის ინტერესებში, რომელსაც ოკუპირებული აქვს ქვეყნის ტერიტორიის 20%. ამიტომ ჩვენ, „ქართული ოცნება“, ხელისუფლება საარჩევნო სისტემას, არჩევნებს და პოლიტიკურ სისტემას განვიხილავთ როგორც უსაფრთხოების ერთ-ერთ მნიშვნელოვან კომპონენტს“, - განაცხადა არჩილ თალაკვაძემ.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდა. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.