არჩილ თალაკვაძე: ქვეყანაში რევოლუციას სახალხო მხარდაჭერა არ აქვს

პარტიის შიგნით სააკაშვილს რჩება სულ უფრო ნაკლები მხარდამჭერი, ვინც რევოლუციასა და გადატრიალებას ემხრობა, - ამის შესახებ გადაცემაში „SWOT ანალიზი“ პარლამენტის თავმჯდომარემ, არჩილ თალაკვაძემ განაცხადა.

მისივე თქმით, შეთანხმების ჩაგდების მომხრეთა შორის სააკაშვილი თითქმის მარტოობაში აღმოჩნდა.

„ოპოზიციის დესტრუქციულმა ნაწილმა ბოლო 2-3 წლის განმავლობაში რამდენჯერმე დაინახა, რომ დესტაბილიზაციას ქვეყანაში სახალხო მხარდაჭერა არ აქვს. მოქალაქეებს სურთ სტაბილური და პროგნოზირებადი მომავალი, ეკონომიკური განვითარება, პასუხისმგებლიანი ხელისუფლება, რომელიც შეცდომებზე რეაგირებს. ეს ხდებოდა შუალედური არჩევნების დროს, რამდენჯერმე მოხდა საპროტესტო აქციების დროს. მათ რამდენჯერმე მოსინჯეს ნიადაგი და დაინახეს, რომ ამ ტიპის აქტივობებს დიდი სახალხო მხარდაჭერა არ ჰქონდა. როდესაც ადამიანები აქციებზე ამ დესტრუქციული ოპოზიციის ლიდერებს ხედავდნენ, ისინი აქციიდან სახლებში მიდიოდნენ, ვინაიდან ხალხი აქციაზე სხვა რამისთვის იყო მისული. ჩვენმა ოპონენტებმა დაინახეს, რომ საზოგადოებაში გადატრიალებას მხარდაჭერა არ აქვს. ეს არაა 2003 წელი ან 1990-იანები, დღეს სხვა საქართველო გვაქვს, რომელიც განვითარების სხვა ეტაპზე იმყოფება. საზოგადოება ამას ხედავს და ითხოვს სტაბილურ, პროგნოზირებად მომავალს და არა არეულობებს, რევანშებს და შურისძიებას, რაზეც ეს დესტრუქციული ძალები 100-დან 100-ვე ვარიანტში არიან წამსვლელები“, - განაცხადა თალაკვაძემ.

მისივე თქმით, ოპოზიციასთან კონსულტაციების პროცესში ხელისუფლების სტრატეგიულ მოთმინებას პრინციპული მნიშვნელობა ჰქონდა.

„ხელისუფლებამ ასევე აჩვენა გადაწყვეტილების მიღების უნარი, მაგრამ ერთ-ერთი მნიშვნელოვანი ფაქტორი იყო ის, თუ რა ხდება ამ გუნდში, რომელსაც „ნაციონალური მოძრაობა“ და მიხეილ სააკაშვილი ჰქვია. ამ გუნდშიც იცვლება მოცემულობა და შიდა ბალანსი. მე ვფიქრობ, რომ პარტიის შიგნით სააკაშვილს რჩება სულ უფრო ნაკლები მხარდამჭერი, ვინც რევოლუციას და გადატრიალებას ემხრობა. ეს გამოიკვეთა მოლაპარაკებების პროცესშიც - როგორც საჯარო განცხადებებში, ასევე მოქმედებებში. შეიძლება ეს იყოს მათთვის კომპლიმენტი, მაგრამ შეთანხმების ჩაგდების მომხრეთა შორის სააკაშვილი თითქმის მარტოობაში აღმოჩნდა. ბოლო პერიოდში ყველა, „ნაციონალური მოძრაობის“ გარდა, გამოთქვამდა წინასწარ მზადყოფნას შეხვედრისთვის. რევოლუციას, არეულობას, უკან დაბრუნებას ამ ქვეყანაში მომავალი არ აქვს. ჩვენი პარტიის ყურადღება გადატანილია მომავალზე - გვინდა ეკონომიკის კიდევ უფრო მეტად განვითარება, უსაფრთხოების განმტკიცება, განათლების რეფორმა, ინფრასტრუქტურის განვითარება და ნატოსა და ევროკავშირში შესვლა. მეორე მხარეს კი დარჩა რამდენიმე პარტია, რომლებიც ხელს უშლიან ქვეყნის განვითარებას და ამტკიცებენ, რომ საქართველო შორდება ნატოს, როდესაც ნატო საპირისპიროს ამბობს“, - დასძინა პარლამენტის თავმჯდომარემ.