გიგა ბოკერია საარჩევნო კოდექსზე მიღწეული შეთანხმების შესრულებას ითხოვს

ვიდრე არ შესრულდება ორივე კომპონენტი, შეთანხმება არ არის შესრულებული. ჩვენთვის არანაირი მნიშვნელობა არ აქვს რა ინსტრუმენტით შეასრულებს ივანიშვილის ხელისუფლება ამას, იქნება ეს აპელაცია თუ შეწყალება, - ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ განაცხადა.

მისივე თქმით, ყველა ის პირი, ვისაც ეხებოდა მოლაპარაკება უნდა გათავისუფლდეს და საარჩევნო კოდექსზე მიღწეული შეთანხმება შესრულდეს.

გიგა ბოკერიას განცხადებით, საქართველო და მსოფლიო არსებულ ვითარებას გადალახავს და არჩევნები ჩატარდება.

„იმ დროს, როდესაც საქართველოს სჭირდება ჩვენი საერთაშორისო მეგობრების დახმარება და ყურადღება, ამ უმძიმესი გამოწვევის დროს, ამ ტიპის პრობლემების შექმნა ქართული დემოკრატიისთვის და დადებული პირობის არშესრულება, არის დამატებითი ზიანი ჩვენი ქვეყნისთვის. კიდევ ერთხელ ძალიან მკაფიოდ გვინდა ჩვენი პოლიტიკური გუნდის სახელით, მაგრამ მე გავრისკავდი და ვიტყოდი მთელი პოლიტიკური სპექტრისა და საზოგადოების სახელით, რომ ახლა ჩვენ გვაწუხებს ეს უმძიმესი გამოწვევა, მაგრამ საქართველო და მსოფლიო ამას გადალახავს და ჩვენ გვექნება არჩევნები და საქართველოს სჭირდება ნორმალური ვითარება. ნორმალურ ვითარებას სჭირდება ამ შეთანხმების შესრულება და ილუზია, რომ ყურადღება გადატანილია და არავინ არ მიაქცევს, არის უბრალოდ სიბრიყვე, ოღონდ ქვეყნისთვის საზიანო სიბრიყვე და ამ ფასს გადაიხდის თვითონ ივანიშვილი, მაგრამ, სამწუხაროდ, გადაიხდის ქვეყანაც. ვიდრე არ შესრულდება ორივე კომპონენტი, შეთანხმება არ არის შესრულებული. ჩვენთვის არანაირი მნიშვნელობა არ აქვს რა ინსტრუმენტით შეასრულებს ივანიშვილის ხელისუფლება ამას, იქნება ეს აპელაცია, შეწყალება. შედეგი უნდა დადგეს და ყველა ის პირი, ვისაც ეხებოდა ეს მოლაპარაკება უნდა იყოს თავისუფალი და საარჩევნო კოდექსზე მიღწეული შეთანხმება უნდა შესრულდეს. თუ რამე არ შესრულდა, ესე იგი შეთანხმება მთლიანად ჩაშლილია“, - განაცხადა გიგა ბოკერიამ.

საქართველოში აშშ-ის საელჩო “გამარჯვებული საქართველოს” ლიდერის, ირაკლი ოქრუაშვილისთვის 5 წლით თავისუფლების აღკვეთას ფაქტს გამოეხმაურა და აღნიშნა, რომ ოქრუაშვილის დაპატიმრების დრომ და გარემოებამ გამოიწვია შეშფოთება პოლიტიკურ ჩარევასა და შერჩევითი სამართლის გამოყენებასთან დაკავშირებით.

მმართველ გუნდსა და ოპოზიციას შორის შეთანხმება 8 მარტს შედგა. შეთანხმება ითვალისწინებს, რომ საარჩევნო სისტემა 2020 წლის არჩევნებისთვის დაეფუძნება 120 პროპორციულ და 30 მაჟორიტარულ მანდატს, საარჩევნო ოლქების სამართლიან განაწილებას, 1%-იან საარჩევნო ბარიერს და ჩამკეტს, რომელიც უზრუნველყოფს, რომ ხმების 40%-ზე ნაკლების მიმღებმა პარტიამ საპარლამენტო უმრავლესობის შექმნა ვერ შეძლოს.