მამუკა მდინარაძე: ელჩების განცხადება დოკუმენტის შინაარს ადასტურებს და არა ოპონენტების ინტერპრეტაციას

საქართველოში პოლიტიკური დიალოგის შუამავლების განცხადება კიდევ ერთი დასტურია, რომ „ნაციონალური მოძრაობა“ და მთელი მისი „კლასტერი“ 180 გრადუსით განსხვავებულ ვერსიას სთავაზობენ საზოგადოებას“, - ამის შესახებ საქართველოს პარლამენტის უმრავლესობის ლიდერმა მამუკა მდინარაძემ განაცხადა.

მამუკა მდინარაძე აღნიშნავს, რომ ელჩები განცხადებაში ადასტურებენ იმ შინაარსს, რაც დოკუმენტშია მითითებული და არა ოპონენტების ინტერპრეტაციას.

„ახლახან გავრცელდა ჩვენი პარტნიორი ქვეყნების წარმომადგენლების, ელჩების განცხადება, სადაც ისინი ადასტურებენ იმ შინაარსს და სულისკვეთებას, რაც მითითებულია დოკუმენტში, რომელსაც ჩვენი მხრიდანაც მოეწერა ხელი და არა იმ ინტერპრეტირებას, რომელიც ჩვენი ოპონენტების მხრიდან მთელი დღისა და წინა პერიოდის განმავლობაში ისმოდა.

შინაარსსა და სულისკვეთებაზე არის პირდაპირი მითითება. ჩვენ ვამბობდით, რომ შეთანხმება შედგა იმაზე, რაც დოკუმენტის მეორე ნაწილში წერია და არა იმაზე, რასაც ყვებოდნენ და ჩვენი ოპონენტები საზოგადოებას ატყუებდნენ. ეს ნიშნავს კიდევ ერთ დასტურს, რომ 180 გრადუსით განსხვავებულ ვერსიას სთავაზობს საზოგადოებას „ნაციონალური მოძრაობა“ და მთელი მისი „კლასტერი“, მათი მხარე. შეთანხმება შეეხებოდა აბსოლუტურად სხვას - მართლმსაჯულებაში არჩარევას და ამაზეა პირდაპირი მითითება დღეს ელჩების მიერ გავრცელებულ განცხადებაშიც“, - განაცხადა მამუკა მდინარაძემ, რომლის კომენტარს პარლამენტი ავრცელებს.

ოპოზიციასა და მმართველ პარტიას შორის დიალოგის შუამავლებმა ერთობლივი განცხადება გაავრცელეს.

განცხადების ავტორები აღნიშნავენ, რომ ოპოზიციასა და „ქართულ ოცნებას“ შორის შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, რაც სასამართლო სისტემაში პოლიტიკურ ჩარევას ჰგავს. ელჩები მოუწოდებენ ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს. ამასთან, აღნიშნავენ, რომ მათი როლი არ არის განხილვების შინაარსის გასაჯაროება ან შეთანხმების განმარტება.

შუამავლების ამ ტექსტს მმართველი გუნდის ლიდერების განცხადებები უძღოდა წინ. დღეს არჩილ თალაკვაძემ მოლაპარაკების შუამავალ ელჩებს სთხოვა, ნათელი მოჰფინონ ოპოზიციასთან შეთანხმების შინაარსს.

ოპოზიცია აცხადებს, რომ შეთანხმება შედგა გიგი უგულავას, გიორგი რურუასა და ირაკლი ოქრუაშვილის გათავისუფლებაზე.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდა. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.