გიორგი კახიანი: საქართველოში დღეს პოლიტიკური პატიმრები არ არიან, ჩვენ წარსულს ჩავაბარეთ ის დრო, როდესაც პოლიტპატიმრები გვყავდა

ჩვენთვის ძალიან მნიშვნელოვანია და განსაკუთრებულ ყურადღებას ვაქცევთ, ასევე შესაბამისი ანალიზი კეთდება იმ შეფასებებსა და განცხადებებზე, რომლებსაც ჩვენი მეგობრების მხრიდან ბოლო პერიოდში ვისმენთ და ჩვენ მას როგორც რჩევა ისე ვიღებთ, - ამის შესახებ გიორგი კახიანმა ტელეკომპანია „რუსთავი 2“-ის ეთერში განაცხადა.

მისივე თქმით, ის შეფასებები, რომლის მიხედვით საქართველოში პოლიტიკური პატიმრები არსებობენ, რა თქმა უნდა, არ ვეთანხმებით.

„გვახსოვს ისიც, რომ მსგავსი შეფასებები კეთდებოდა ადრეც, მაგალითად 2013 წელი რომ გავიხსენოთ ახალაიასთან, მერაბიშვილთან მიმართებაში მათაც როგორც პოლიტპატიმრებს ისე მოიხსენიებდნენ. ასე რომ, მსგავსი რამ ადრეც იყო, ამას ბუნებრივია, ჩვენი მხრიდან შესაბამისი რეაგირება მოჰყვება. საქართველოში დღეს პოლიტიკური პატიმრები არ არიან, ჩვენ წარსულს ჩავაბარეთ ის დრო, როდესაც პოლიტპატიმრები იყვნენ. თუმცა საყურადღებოა ჩვენი მეგობრების განცხადება და ჩვენ ამას ყურადღებით ვეკიდებით. შემთხვევითი არ იყო, როდესაც ევროპარლამენტარებს შევთავაზეთ შეექმნათ კომისია და სწორედ ამ კითხვასთან დაკავშირებით, რომლებიც შეიძლება გააჩნდეთ მათ ე.წ. პოლიტპატიმრებთან მიმართებაში, ჩამოსულიყვნენ აქ და ბუნებრივია, ადგილზე იქნებოდა მეტი შესაძლებლობა, რომ სწორი ინფორმაცია მიეღოთ და გაეკეთებინათ შეფასებები და დასკვნები“, - განაცხადა კახიანმა.

პარლამენტის თავმჯდომარის მოადგილემ საარჩევნო რეფორმასა და საკონსტიტუციო ცვლილებების საკითხებზეც ისაუბრა და აღნიშნა, რომ 120/30 საარჩევნო მოდელი ხელისუფლების მხრიდან გადადგმული ნაბიჯიდან შეიქმნა, ხოლო ოპოზიციის მონაწილეობა კი დესტრუქციაში აისახებოდა, ნაცვლად რაიმე კონსტრუქციული მიდგომისა.

„დღეს ოპოზიციის შეფასებები არის არათანმიმდევრული და არაადეკვატური. კურიოზია, აბსურდია სხვა თუ არაფერი, როდესაც საუბრობენ, რომ მაშინ როდესაც ხელისუფლება ვამბობთ, რომ ჩვენ, რა თქმა უნდა, ამ საარჩევნო სისტემას მხარს დავუჭერთ და ოპოზიცია ამბობს, რომ ისინი ამას მხარს არ დაუჭერენ და თითქოს ჩვენ ვაპირებთ საარჩევნო სისტემის ჩაგდებას, ეს ხომ სრული აბსურდია, ამას ელემენტარული ლოგიკა სჭირდება, რომ მიხვდე ამაში ვინ რა როლს თამაშობს.

მინდა საზოგადოებას მივმართო და აღვნიშნო, რომ ძალიან მარტივი დაკვირვებაა საჭირო, იმისთვის, რომ გაირკვეს ვინ მართალს ამბობს და ვინ ტყუის. ჩვენ ვართ იმ შეთანხმების ერთგულნი და ჩვენ აუცილებლად გავაკეთებთ ყველაფერს, რაც იქნება საჭირო რათა კონსტიტუციაში საარჩევნო სისტემის ცვლილება განხორციელდეს. თუ ოპოზიცია შესაბამის გადაწყვეტილებას ვერ მიიღებს, ეს ნიშნავს იმას, რომ ისინი არ არიან მზად მიიღონ ქვეყნისთვის უმნიშვნელოვანესი გადაწყვეტილება და ეს ცხადია იქნება მათი პოლიტიკური პასუხისმგებლობა“, - აღნიშნა გიორგი კახიანმა.​

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

ოპოზიციის განცხადებით, შეთანხმება შედგა გიგი უგულავას, გიორგი რურუასა და ირაკლი ოქრუაშვილის გათავისუფლებაზეც. 11 მაისს არჩილ თალაკვაძემ მოლაპარაკების ფასილიტატორ ელჩებს სთხოვა, ნათელი მოჰფინონ ოპოზიციასთან შეთანხმების შინაარსს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.