ბულგარეთის ვიცეპრეზიდენტი: ქართველებო, გილოცავთ ეროვნულ დღესასწაულს, განაგრძეთ ქრისტიანობის ციხე-სიმაგრედ ყოფნა, იყავით დამოუკიდებელნი

საქართველოს დამოუკიდებლობის დღის აღსანიშნავად, ბულგარეთში საქართველოს საელჩოს ინიციატივით, საელჩოს Facebook-ის გვერდზე ვიდეოკონფერენცია გაიმართა, რომელშიც მონაწილეობა მიიღო საქართველოს ელჩმა თამარ ლილუაშვილმა.

ვიდეოკონფერენციის ფარგლებში, ბულგარეთის ხელისუფლების წარმომადგენლებმა, მათ შორის ბულგარეთის ვიცეპრეზიდენტმა ილიანა იოტოვამ, საგარეო საქმეთა სამინისტროს გლობალურ საკითხთა დეპარტამენტის დირექტორმა, პლამენ ბონჩევმა (ბულგარეთის ყოფილი ელჩი საქართველოში), „ატლანტიკური კლუბის“ თავმჯდომარემ, პროფესორმა სოლომონ პასიმ, ასევე საქართველოს საპატიო კონსულებმა ბულგარეთის რესპუბლიკაში იული ნუშევმა, დინკო დინევმა და სოფიაში აკრედიტირებულმა დიპლომატიური წარმომადგენლობების ხელმძღვანელებმა საქართველოს დამოუკიდებლობის დღე მიულოცეს.

პირდაპირ ეთერში ასევე ჩაერთნენ ქართული კულტურისა და ესტრადის წარმომადგენლები, ნინო სუხიშვილი, მაია ბარათაშვილი და სხვები.

„გმადლობთ შესაძლებლობისთვის, მოგილოცოთ ეს დღესასწაული. მიუხედავად პანდემიით გამოწვეული შეზღუდვებისა, მოხარული ვარ, რომ აღნიშნული ფორმით გვეძლევა საქართველოს დამოუკიდებლობის დღის აღნიშნვის შესაძლებლობა. არსებული პანდემია ითხოვს მასთან საბრძოლველად ძალისხმევათა გაერთიანებას და ერთად დგომას. აღნიშნული პოზიცია გაჟღერდა ცოტა ხნის წინ ბულგარეთის რესპუბლიკის პრეზიდენტ რუმენ რადევსა და საქართველოს პრეზიდენტ სალომე ზურაბიშვილს შორის გამართული სატელეფონო საუბრისას. სრულიად ვიზიარებ ამ აზრს - არსებული პანდემიის პირობებში აუცილებელია სწორი ბალანსის პოვნა ჯანდაცვით ღონისძიებებსა და სოციალურ-ეკონომიკურ ნაბიჯებს შორის, ვინაიდან ფინანსური შედეგები, რომლებიც მოჰყვება კრიზისს, განსაკუთრებით მძიმე იქნება რიგითი მოქალაქეებისათვის. სწორედ აქ არის მნიშვნელოვანი სახელმწიფოსა და მთავრობის როლი.

მსურს, გაგიზიაროთ, რომ ღონისძიებაზე ჩემი საზოგადოებაში ერთ-ერთი ბოლო გამოჩენა, პანდემიის მიერ ყველა ღონისძიების გაუქმებამდე, იყო სწორედ საქართველოს საელჩოს მიერ ორგანიზებული გამოფენა „სამოთხის შეხება“, სადაც ახალგაზრდა, ძალიან ნიჭიერი ხელოვანის, გიორგი სისაურის ნიმუშების ხილვა შეგვეძლო. დღეს, ჩემს კაბინეტში ღირსეულ ადგილს იკავებს გიორგი სისაურის მიერ ჩემთვის ნაჩუქარი ძვირფასი საჩუქარი - ნახატი, ქართულ ენაზე, კალიგრაფიულად შესრულებული ჩემი სახელით.

გილოცავთ ეროვნულ დღესასწაულს, ქართველებო. თქვენ მრავალსაუკუნოვანი ისტორიის მქონე სახელმწიფო ხართ, რომელიც ევროპასა და აზიას შორის მოკავშირის როლს ასრულებს, როგორც გეოგრაფიულად, კულტურულად, ისე - ბევრი სხვა მიმართულებით. დღეს საქართველო მრავალი საერთაშორისო ორგანიზაციის წევრია. სულ რამდენიმე დღის წინ საქართველომ დაასრულა ევროპის საბჭოს თავმჯდომარეობა, რომელიც ძალიან ნაყოფიერად და წარმატებულად ჩატარდა. ყოველივე აღნიშნული ძალიან საპასუხისმგებლოა. მაგრამ მე დარწმუნებული ვარ, რომ თქვენ ყოველივეს გაართმევთ თავს, როგორც ერი, რომელსაც გააჩნია უზარმაზარი ტრადიციები, მრავალი ბრძოლისა და წინააღმდეგობების გადალახვის გამოცდილება. ძვირფასო ქართველებო, გააგრძელეთ ქრისტიანობის ციხე-სიმაგრედ ყოფნა, იყავით დამოუკიდებელნი, იყავით წარმატებულნი ეკონომიკური, ფინანსური და პოლიტიკური კრიზისების წინაშე. დარწმუნებული ვარ, თქვენი დევიზის „ძალა ერთობაშია“ მართებულობასა და წარმატებაში, მით უფრო, რომ ბულგარეთის დევიზია „ერთობა ქმნის ძალას“. საუკეთესო სურვილებით თქვენი ქვეყნისა და ჩვენი ორმხრივი ურთიერთობებისათვის. დამოუკიდებლობის დღეს გილოცავ, საქართველოვ“ - განაცხადა ბულგარეთის ვიცეპრეზიდენტმა, ილიანა იოტოვამ.

26 მაისს საქართველოში დამოუკიდებლობის დღე აღინიშნება. 1918 წლის 26 მაისს, თბილისში საქართველოს ეროვნულმა საბჭომ სახელმწიფოებრივი დამოუკიდებლობის აქტი მიიღო. საქართველოს დემოკრატიულმა რესპუბლიკამ, რომლის დამოუკიდებლობა ევროპის წამყვანმა ქვეყნებმა ცნეს, არსებობა არასრული სამი წლის თავზე, საბჭოთა რუსეთის მიერ განხორციელებული ოკუპაციის შემდეგ, შეწყვიტა. საქართველომ დამოუკიდებლობის აღდგენა 70 წლის შემდეგ, 1991 წლის 9 აპრილს, შეძლო.