რომან გოცირიძე: საქართველო ერთ-ერთი ყველაზე მოშიმშილე ქვეყანაა მსოფლიოში

2 დღის წინ ჩვენ მოვისმინეთ პრემიერ-მინისტრის 11-საათიანი მოხსენება, თუმცა ვერ მოვისმინეთ ვერც ერთი ზუსტი და დამაიდებელი პასუხი, რომელიც ამ უმძიმეს მდგომარეობაში ჩავარდნილ ჩვენს მოქალაქეებს სიმშვიდეს, მხარდაჭერასა და დახმარებას მოუტანდა, - ამის შესახებ „ნაციონალური მოძრაობის“ ერთ-ერთმა ლიდერმა, რომან გოცირიძემ პარლამენტის პლენარულ სხდომაზე განაცხადა, სადაც გიორგი გახარიას ინტერპელაციის წესით უსმენენ.

მისი განმარტებით, „ნაციონალური მოძრაობის“ შეკითხვა სიღარიბეს ეხება. „საქართველოს მთავრობა არის ერთადერთი ხელისუფლება, რომელმაც კორონავირუსის პერიოდში თავის მოქალაქეებს არ გაუწია არც ერთი თეთრი ფინანსური დახმარება. ასეთი რამ არ მომხდარა არც ერთ ჩვენს სამეზობლოში და არც მსოფლიოში. სახლში გამოკეტილი ხალხი, ყოველგვარი შემოსავლის გარეშე დარჩენილი ადამიანები ფაქტობრივად გაწირეთ სიკვდილისთვის“, - აღნიშნა რომან გოცირიძემ.

მისივე თქმით, კორონავირუსის ფონდიდან არც ერთი თეთრი არ დახარჯულა. „სად არის ივანიშვილის 100 მილიონი? არჩევნებისთვის ინახავთ, თქვენ თქვით, რეზერვებად გვინდა შევინახოთო. სად არის 33 მილიონი ამ ფონდიდან, რომელიც ბიზნესმა შეიტანა? ვის გაუგია, უმძიმეს მდგომარეობაში, როდესაც ხალხი სულს ღაფავს შიმშილისგან, 133 მილიონი მუთაქაში გქონდეთ გამოდებული და შენახული? რატომ არ გაეცით ეს ფული? თუ კვლავ გინდათ, როგორც 80 მილიონზე გააკეთა ივანიშვილმა სტიქიის დროს, უკან დაუბრუნოთ. თუ ვერ ბედავთ ივანიშვილის ასე ვთქვათ ფულის ხელის ხლებას? თუ საერთოდ არის კი ეს ფული? არსებობს კი ეს 100 მილიონი?“ - მიმართა რომან გოცირიძემ პრემიერ-მინისტრს.

ამასთან, დეპუტატმა აღნიშნა, რომ საქართველო ერთ-ერთი ყველაზე მოშიმშილე ქვეყანაა მსოფლიოში.

„საქართველო არის ქვეყანა, რომელიც კორონავირუსისა და ამ ნავთობის კრიზისის პერიოდში, რომლის ეკონომიკა არის ყველაზე დაუძლურებული, ყველაზე სუსტი, ყველაზე მოწყვლადია მსოფლიოს 63 ქვეყანას შორის, რომლის კვლევა გააკეთა ევროპის საერთაშორისო სარეიტინგო სააგენტომ. 63 ქვეყანა გამოიკვლიეს, ვართ 63-ე ადგილზე. 62-ე არის თურქეთი. 61-ე არგენტინა. ანუ საქართველოს ეკონომიკა არის იმდენად დასუსტებული და დაუძლურებული, ამ რვა წლის განმავლობაში იმდენად ცუდი პოლიტიკა აწარმოეთ, კორონავირუსის ამ კრიზისმა ყველაზე მძიმე და საშინელი დარტყმა მიაყენა საქართველოს ეკონომიკას. საქართველო არის ერთ-ერთი ყველაზე მოშიმშილე ქვეყანა მსოფლიოში. აგერ, შიმშილის მსოფლიო ინდექსი 2019 წლის მიხედვით, საქართველო არის რეგიონში ყველაზე ცუდ მდგომარეობაში. მას უსწრებს თურქეთი, აზერბაიჯანი, სომხეთი, ყირგიზეთი, ირანი, სერბეთი, უკრაინა, ბელარუსი. ყველაზე მეტად ხალხი შიმშილობს საქართველოში“, – განაცხადა რომან გოცირიძემ.