თინა ბოკუჩავა გიორგი გახარიას: თქვენ მხოლოდ საკუთარი ჯიბეების გასქელებაზე ზრუნავთ

მომავალ რამდენიმე თვეში ეკონომიკური ვითარება ბევრად უფრო დამძიმდება. გამოსავალი თქვენ, რა თქმა უნდა, არ გაქვთ, ვინაიდან თქვენ მხოლოდ საკუთარი ჯიბეების გასქელებაზე ზრუნავთ, მაგრამ დარწმუნებული ვარ, რომ ძალიან მალე ამ ქვეყანას ეყოლება ხელისუფლება, რომელიც მოემსახურება ხალხს, - ამის შესახებ საგაზაფხულო სესიის პლენარულ სხდომაზე სიტყვით გამოსვლისას „ნაციონალური მოძრაობის“ წევრმა თინა ბოკუჩავამ განაცხადა.

„პარლამენტისთვის პრემიერის მხრიდან პარლამენტში მოსვლის დაყვედრება არის უკიდურესი უტიფრობა, იმიტომ რომ კონსტიტუციის მიხედვით გვაქვს საპარლამენტო რესპუბლიკა და თქვენ გაქვთ ვალდებულება, რომ აქ მობრძანდეთ. არაფერი „ქართული“ კორუფციაში არ არის, ეს არის რუსული და საბჭოური ფენომენი, რომელიც თქვენთვის ის ძალიან მშობლიურია. ჩვენ ვაშენებდით სახელმწიფოს, რომელიც კორუმპირებული გეოგრაფიული ერთეულიდან იქცა რეფორმების სამაგალითო ადგილად, თქვენ კი დაგვაბრუნეთ შევარდნაძის დროში, როდესაც ისევ „გაგებით“ გაიცემა ტენდერები და რიგდება საბიუჯეტო სახსრები. სწორედ იმისთვის, რომ დავეხმაროთ ადამიანებს და გაიცეს რეალური დახმარება, ჩვენ შემოგთავაზეთ გეგმა, რომლის მიხედვითაც საქართველოს ყველა მოქალაქე მიიღებდა პირდაპირ ფულად 1000-ლარიან დახმარებას, ხოლო ყველა არასრულწლოვანი - 500-ლარიან დახმარებას. ბატონო პრემიერო, ეს განკარგულება 2 დღის გადმოგეცით თქვენ ხელმოსაწერად და მაინტერესებს, შეისწავლეთ თუ არა ეს დახმარების პაკეტი. რატომ არ აწერთ ხელს იმას, რაც რეალურად დაეხმარება საქართველოს მოქალაქეებს? ეს ფული ისევ ეკონომიკაში ჩაბრუნდება და ასევე ამოასუნთქებს უამრავ ადამიანს, იმიტომ რომ მოსახლეობის 69% უკიდურეს სიღარიბეში ცხოვრობს. თქვენ რომ აქ თავმომწონედ საუბრობთ იმაზე, რომ სიღარიბე არ არსებობს, სინამდვილეში შიმშილობის ინდექსით საქართველო რეგიონში არის პირველი. მომავალ რამდენიმე თვეში ეკონომიკური ვითარება ბევრად უფრო დამძიმდება. გამოსავალი თქვენ, რა თქმა უნდა, არ გაქვთ, ვინაიდან თქვენ მხოლოდ საკუთარი ჯიბეების გასქელებაზე ზრუნავთ, მაგრამ დარწმუნებული ვარ, რომ ძალიან მალე ამ ქვეყანას ეყოლება ხელისუფლება, რომელიც მოემსახურება ხალხს“, - განაცხადა ბოკუჩავამ.