აზერბაიჯანელი უფლებადამცველი: აფგან მუხტარლი შესაძლოა თვითმკვლელობამდე მიიყვანონ

"სამწუხაროდ, არ გამოვრიცხავ, რომ აზერბაიჯანში ალიევის რეჟიმმა მუხტარლის თვითმკვლელობა აიძულოს, ან სხვა ფორმით მოკლას, - ამის შესახებ აზერბაიჯანელმა უფლებადამცველმა და პოლიტიკოსმა ვიდადი ისგანდეროვმა აზერბაიჯანელი ჟურნალისტის აფგან მუხტარლის ქვეყნიდან გაყვანასა და აზერბაიჯანში დაკავებასთან დაკავშირებით განაცხადა. ინფორმაციას სააგენტო ipn ავრცელებს.

როგორც ვიდადი ისგანდეროვმა აღნიშნა, 2015 წელს აფგან მუხტარლი იძიებდა „ალიევის მაფიოზურ ინვესტიციებს საქართველოში“. ისგანდეროვის თქმით, გამოძიებამ ბევრი საინტერესო რამ აჩვენა, რის გამოც აფგან მუხტარლისა და მას სისტემატურად უთვალთვალებდნენ. 

”პრაქტიკა ამას აჩვენებს, რომ რამდენიმე პოლიტიკურმა პატიმარმა თავი საპყრობილეში მოიკლა. აზერბაიჯანის მთავრობა კი იმაზე აპელირებს, რომ მათ ვერ გაძლეს პატიმრობაში. ბოლოს, სანამ აფგანს მოიტაცებდნენ, მან ინტერვიუ მისცა „ამერიკის ხმას“, სადაც ის ამბობდა, რომ მისი დაკავების საფრთხე არსებობდა. ის უკვე 2 წელია, რაც საქართველოში იყო, თუმცა მთელი ამ პერიოდის განმავლობაში მეც და მუხტარლისაც მუდმივად გვითვალთვალებდნენ საქართველოში. ალიევმა ისეთი რეჟიმი შექმნა, რომ საელჩოში მუდმივად არის 20-30 ადამიანი, ვინც სპეცსამსახურების წარმომადგენლებია და ოპოზიციონერებს უთვალთვალებს”, - განაცხადა ვიდადი ისგანდეროვმა.

თავად ვიდადი ისგანდეროვი საქართველოში პოლიტიკური დევნილის სტატუსით ცხოვრობს. თუმცა მას საქართველოს ხელისუფლების წარმომადგენლებმა არაოფიციალურად ქვეყნიდან წასვლა მოსთხოვეს. აზერბაიჯანელი უფლებადამცველი კონკრეტულ მოხელესაც ასახელებს. 

”მაგალითად, ჩემზე თავდასხმის 3 მცდელობა იყო. ცდილობდნენ, ჩემი 16 წლის ქალიშვილი გაეტაცებინათ. მათ ჩემი გატაცება არ შეუძლიათ, რადგან საქართველოში პოლიტიკური თავშესაფარი მაქვს. აქედან გამომდინარე, მხოლოდ ფიზიკური განადგურება რჩება. 

3 დღის წინ საქართველოს დევნილთა საკითხებზე მომუშავე უწყებაში გამომიძახეს და მითხრეს, რომ ალიევი მათ აშანტაჟებს და ეუბნება, რომ აზერბაიჯანის ოპოზიციურ ძალებს არ მისცენ თავშესაფარი. მათ მე კულტურულად მითხრეს, რომ უნდა წავიდე. გადამამისამართეს ”გაეროსთან”, რათა მომეძებმნა მესამე ქვეყანა, სადაც წასვლას შევძლებდი, მაგრამ მე იქაც უარი მითხრეს. ამის შემდეგ ვკითხე ირაკლი კოკაიას (რეპატრიაციისა და ლტოლვილთა საკითხების დეპარტამენტის უფროსი), თუ რატომ მიშვებდნენ ქვეყნიდან. მისი თქმით, არ შეუძლია თქვას, რომ საქართველოს, როგორც სახელმწიფოს, არ შეუძლია ჩემი უსაფრთხოების უზრუნველყოფა, თუმცა აღნიშნა, რომ თუ უსაფრთხოება მინდა, უნდა წავიდე”, - განაცხადა ისგანდეროვმა.

აზერბაიჯანელი ჟურნალისტის, აფგან მუხტარლის საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს.

ჟურნალისტი თბილისიდან 29 მაისს გაუჩინარდა. მოგვიანებით, ცნობილი გახდა, რომ ის ბაქოში გადაიყვანეს.