ანრი ოხანაშვილი: ჩვენი თვითმიზანი არ არის ვინმეს დაჯარიმება

ჩვენი თვითმიზანი არ არის ვინმეს დაჯარიმება და დასჯა, - ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა პარლამენტის სხდომაზე „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ კანონპროექტის წარდგენისას განაცხადა, რომლითაც ახლებურად რეგულირდება პირბადეების ტარების და სხვა საკარანტინო-საიზოლაციო საკითხები.

მისი თქმით, იქ, სადაც აღარ რჩება სივრცე იმისთვის, რომ ადამიანი პასუხისმგებლობით მოიქცეს და დაექვემდებაროს წესებს, მაშინ სახელმწიფოს უწევს ჩარევა, რათა დაიცავს ადამიანების სიცოცხლე და ჯანმრთელობა.

„ყველამ კარგად უნდა გავაცნობიეროთ, რომ კონორავირუსთან ბრძოლა არ დასრულებულა, რაც იმას ნიშნავს, რომ შესაძლებელია ნიებისმიერ ჩვენგანი ვიყოთ პოტენციური მსხვერპლი კონორავირუსის. შემდგომში ამან შეიძლება გამოიწვიოს გავრცელება. ჩვენი მეზობელი ქვეყნების გამოცდილებაც გვიჩვენებს, რამდენად რთულია ამის წინააღმდეგ ბრძოლა. შესაბამისად, ჩვენ უნდა გავითვალისწინოთ საერთაშორისო გამოცდილება და ჩვენი მეზობელი ქვეყნების გამოცდილება. ეს არის უმძიმესი გამოწვევა, რომელსაც დიდი პასუხისმგებლობით სჭირდება მიდგომა, ჩვენ უნდა გავითვალისწინოთ ყველა ის წესი, რომლიც განსაზღვრულია მსოფლიო ჯანდაცვის ორგანიზაციის მიერ, საერთაშორისო პრაქტიკაზე დაფუძნებით და, შესაბამისად, ამის მიხედვით უნდა ვიმოქმედოთ“, - განაცხადა ანრი ოხანაშვილმა.

მისი თქმით, სახელმწიფოს ვალდებულებაა მოახდინოს რეაგირება, თუმცა ეს რეაგირება არ უნდა იყოს იმდენად მკაცრი, რომ მას არ ჰქონდეს შედეგი და უკუეფექტი გამოიწვიოს.

მისივე განმარტებით, პოპულისტურია ოპოზიციის წარმომადგენელთა განცხადებები, თითქოს, სახელმწიფოს ახალი აკრძალვები შემოაქვს. მისი თქმით, ეს ტყუილია, ვინაიდან ეს აკრძალვები მოქმედებს დღეის მდგომარეობით, ახლა არ შემოგვაქვს, აკრძალვები მოქმედებს და განსაზღვრულია ჯარიმა ფიზიკური პირისთვის 2000 ლარი იზოლაციის წესების ან კარანტინის დარღვევისთვის, იურიდიული პირისთვის 10 000 ლარი, ადმინისტრაციულ სამართალდარღვევათა კოდექსში მოქმედებს ნორმა, რომელიც დღეს ასევე პირბადის არ ტარებისთვის ითვალისწინებს 2000 ლარიან ჯარიმას.

„ეს ნორმები მივიღეთ საგანგებო მდგომარეობის პირობებში, არ ვიცოდით როგორი გამოწვევის წინაშე დავდგებოდით და მაშინ საჭირო იყო მაქსიმალური სანქცია იმისთვის, რომ პრევენცია მოგვეხდინა. მას შემდეგ, რაც ახალ ეტაპზე გადავედით და სახელმწიფომ მოხსნა მთელი რიგი შეზღუდვები იმისთვის, რომ ხელი შევუწყოთ ეკონომიკის განვითარებას, უფლებრივი შეზღუდვები იყოს მაქსიმალურად ნაკლები, ამ გამოწვევის და ამ სტადიიდან გამომდინარე საჭიროა ადაპტირება. ამიტომ გადავწყვიტეთ, რომ ცალკე დავარეგულიროთ პირბადეების საკითხი, ცალკე დავარეგულიროთ ტრანსპორტით გადაადგილების დროს პირბადის ტარების საკითხი, ცალკე იყოს სავაჭრო, დახურულ საჯარო სივრცეში თავშეყრის დროს პირბადის ტარების საკითხი“, - განაცხადა ანრი ოხანაშვილმა.

მისი თქმით, ერთად ერთი ამოცანაა, ვინაიდან ქვეყანა ეტაპობრივ შეზღუდვების მოხსნაზე გადავიდა, ჩვენს მოქალაქეებს ნაკლებ ტვირთად დააწვეს ისეთი საკითხი, როგორიცაა პირბადის ტარების სავალდებულობა და თუ ვინმე უგულებელყოფს სხვათა სიცოცხლეს და ჯანმრთელობას და საზოგადოებრივი თავშეყრის ადგილში იქნება პირბადის გარეშე, შემოთავაზებული ვერსია იყო 50 ლარი, თუმცა შემდგომ, მიუხედავად იმისა, რომ პირბადის გარეშე ყოფნა დიდი რისკის მატარებელია, მძიმე ტვირთად არ დააწვეს საზოგადოებასო, უმრავლესობა 20 ლარზე შეჯერდა.

„ვინაიდან დახურულ საჯარო სივრცეში მეტი რისკია ვირუსის გავრცელების, აუცილებელია პირბადის ტარება. ჩვენი თვითმიზანი არ არის ვინმეს დაჯარიმება, არც ფიზიკური პირის, არც იურიდიული პირის. ჩვენი ამოცანაა - ერთად ვიზრუნოთ ჩვენს ჯანმრთელობაზე, ჩვენი შვილების, ჩვენი ოჯახის წევრების, უფროსი თაობის ჯანმრთელობაზე, ვინაიდან სიტუაცია შესაძლებელია არ დაექვემდებაროს კონტროლს, ამიტომ მოწოდებები ზოგიერთი პოლიტიკოსის მხრიდან, რომ ჩვენ თურმე აკრძალვებს ვაწესებთ, სპეკულაციურია და არ არის საზოგადოების ინტერესებზე მზრუნველი ადამიანის პოზიციიდან ნათქვამი“, - განაცხადა ანრი ოხანაშვილმა.​