ირაკლი კობახიძე: ქართულ-ამერიკული თანამშრომლობა ასეთი მაღალი დონის არასდროს ყოფილა, ეს არის მნიშვნელოვანი და არა სადღაც ლობისტური ჩართულობით ჩასმული ფრაზები

გულდასაწყვეტი და სამარცხვინოა, რომ ასეთ დოკუმენტში ხვდება ლობისტების მიერ ჩასმული წინადადება. დოკუმენტი არის საკმაოდ ვრცელი და მთლიანად დოკუმენტი არის ხელისუფლების მხარდამჭერი, - ამის შესახებ პარლამენტის ყოფილმა თავმჯდომარემ, ირაკლი კობახიძემ აშშ-ის რესპუბლიკელთა კვლევითი კომიტეტის ეროვნული უსაფრთხოების სტრატეგიაზე საუბრისას ჟურნალისტებთან განაცხადა.

მისი თქმით, ფრაზა დოკუმენტში, სადაც საუბარია „ქართული ოცნებასა“ და რუსეთის სახელმწიფოს შორის არსებულ ალიანსზე, წინააღმდეგობაში მოდის დოკუმენტის მთლიან სულისკვეთებასთან. ირაკლი კობახიძე მსგავს განცხადებებს „ნაციონალური მოძრაობის“ ლობისტებს მიაწერს და ამბობს, რომ ქართულ-ამერიკული ურთიერთობა ისეთ მაღალ დონეზე აყვანილი, როგორც დღეს არის, არასოდეს ყოფილა.

„საუბარია მაგალითად იმაზე, რომ უპრეცედენტოდ მაღალია თავდაცვის სფეროში აშშ-სა და საქართველოს შორის თანამშრომლობა. მთლიანი სულისკვეთება დოკუმენტის შეესაბამება ერთიანი ხელისუფლების სულისკვეთებას და იქ არის ერთი წინადადება ჩასმული, რომელიც ყველაფერ დანარჩენს ეწინააღმდეგება. საუბარია იმაზე, რომ თითქოს „ქართული ოცნების“ ხელისუფლება არის ალიანსში რუსეთთან და არის დესტაბილიზაციის წყარო საქართველოში. მაშინ როდესაც ყველამ ვიცით, რომ „ქართული ოცნება“ არის პირველი ხელისუფლება საქართველოში, რომელსაც არ ჰქონია ომი, რომელსაც არ დაუკარგავს ტერიტორიები და რომელმაც უპრეცედენტოდ მაღალ დონეზე მაღალ დონეზე აიყვანა უსაფრთხოების და სტაბილურობის ხარისხი ჩვენს ქვეყანაში. აქ ჩანს ლობისტების ხელი. თქვენ იცით, რომ რამდენიმე თვის წინ იყო სკანდალი. IRI-ს ბორდის ვიცე-პრეზიდენტი იღებს ფულს „ნაციონალური მოძრაობისგან“. ეს არის აბსოლუტურად ღია ინფორმაცია. ასეთი კავშირებით სამწუხაროდ ასეთი ტიპის დოკუმენტებში ხვდება ასეთი წინადადებები. ხვდება შიდა წინააღმდეგობები, რაც კიდევ ერთხელ ვიმეორებ, არის გულდასაწყვეტი და სამარცხვინო. იყო არაერთი პრეცედენტი მსგავსი ლობისტური საქმიანობის. მაგალითად „იმედის“ კანონიერი მესაკუთრისთვის დაბრუნება შერაცხეს როგორც მესაკუთრისთვის ქონების ჩამორთმევა. ამის მცდელობა იყო ევროსაბჭოში და ასეთი განცხადებები არაერთხელ გაკეთებულა ევროპელი პოლიტიკოსების მხრიდან. ლობისტურ საქმიანობას აქვს ვიწრო ლოკალური შედეგი, თუმცა ვერავითარ შემთხვევაში ექნება წარმატების ეფექტი „ნაციონალური მოძრაობისთვის“ და ვერც მათი ლობისტებისთვის. სიმართლე იცის ყველამ, სიმართლე იცის ქართველმა საზოგადოებამ და სიმართლე იცის ამერიკის ხელისუფლებამ. მე შეგახსენებთ, რომ დაახლოებით ორი კვირის წინ რიკერმა, რომელიც არის საგარეო საქმეთა მინისტრის მოადგილე გააკეთა განცხადება, რომლის თანახმადაც არასდროს ყოფილა ქართულ-ამერიკული თანამშრომლობა და ურთიერთობები ისეთ მაღალ დონეზე აყვანილი როგორც არის დღეს. ეს არის მნიშვნელოვანი და არა სადღაც ჩასმული ფრაზები ლობისტური ჩართულობით“, - განაცხადა ირაკლი კობახიძემ.

„ამერიკის გაძლიერება და გლობალური საფრთხეების წინააღმდეგ ბრძოლა“, - აშშ-ის რესპუბლიკელთა კვლევითმა კომიტეტმა ეროვნული უსაფრთხოების სტრატეგია​ გამოაქვეყნა.

ანგარიშის ავტორები არიან კომიტეტის თავმჯდომარე მაიკ ჯონსონი და კომიტეტის ეროვნული უსაფრთხოებისა და საგარეო საქმეთა საკითხებში სამუშაო ჯგუფის თავმჯდომარე ჯო უილსონი.