მარგველაშვილი მუხტარლის საქმეზე: კრიზისის რეჟიმში ვართ

საქართველოს პრეზიდენტი აზერბაიჯანელი ჟურნალისტის აფგან მუხტარლის გაუჩინარებაზე სწრაფ და ადეკვატურ რეაგირებას ითხოვს. გიორგი მარგველაშვილის განცხადებით. ქვეყანა კრიზისულ რეჟიმშია. "სახელმწიფოს იმიჯი სერიოზული დარტყმის წინაშეა. კრიზისის მენეჯმენტის რეჟიმში ვართ, რომ იმიჯი გამოსწორდეს. იმისთვის რომ პასუხი გავცეთ, თუ რა მოხდა როგორც ქვეყნის შიგნით, ასევე ქვეყნის გარეთ. კრიზისების ჯამი თუ სწრაფად არ იქნა პასუხგაცემული, მაშინ კითხვები კიდევ უფრო გაიზრდება. თბილისში გაქრა ადამიანი და ბაქოში აღმოჩნდა. კოპერფილდს უნდა ვკითხოთ თუ ვადაჭკორიას, რა მოხდა? ამ პროცესს თურმე მშვიდად უნდა დაველოდოთ", - განაცხადა გიორგი მარგველაშვილმა.

ეს განცხადება საქართველოს პრეზიდენტმა გიორგი მარგველაშვილმა სახელმწიფო აუდიტის სამსახურში გააკეთა, სადაც ის ადმინისტრაციის უფროს გიორგი აბაშიშვილთან ერთად აუდიტის სამსახურის უფროსს ლაშა თორდიას ხვდება. 

ჟურნალისტი აფგან მუხტარლი თბილისიდან 29 მაისს გაუჩინარდა. ის სახლიდან გავიდა და არ დაბრუნებულა. მოგვიანებით, ცნობილი გახდა, რომ ის ბაქოში გადაიყვანეს. დღეს ბაქოს მას საქალაქო სასამართლომ სამთვიანი წინასწარი პატიმრობა შეუფარდა. ჟურნალისტს აზერბაიჯანის პროკურატურამ ბრალი კონტრაბანდის, სახელმწიფო საზღვრის უკანონო გადაკვეთისა და პოლიციისთვის დაუმორჩილებლობის მუხლებით წარუდგინა.

აფგან მუხტარლის საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს. სახელმწიფო უსაფრთხოების სამსახურის ხელმძღვანელის ვახტანგ გომელაურის განცხადებით, აზერბაიჯანელი ჟურნალისტი „მწვანე საზღვარზე“ დააკავეს და არა გამშვებ პუნქტზე. 

თუმცა, მუხტარლის ადვოკატს, ჟურნალისტებს და არასამთავრობო სექტორს არ სჯერა, რომ მისი საქართველოში მოტაცება და აზერბაიჯანში გადაყვანა ქართული სპეცსამსახურების დახმარების თუ მათი უმოქმედობის გარეშე მოხდა. თბილისში, აზერბაიჯანელი ჟურნალისტის მხარდასაჭერი აქციები იმართება.

მუხტარლის დაკავების ფაქტს საერთაშორისო უფლებადამცველი ორგანიზციები Human Right Watch-ი და Amnesty International-ი გამოეხმაურნენ.