ზვიად ძიძიგურის თქმით, „კონსერვატორები“ საკონსტიტუციო ცვლილებას მხარს დაუჭერენ

„კონსერვატორები“ მხარს ვუჭერთ 120/30 - ვერსიას, - ამის შესახებ პარლამენტში „კონსერვატიული პარტიის“ ხელმძღვანელმა, ზვიად ძიძიგურმა განაცხადა.

მისივე განცხადებით, პროგნოზირება იმისა, დაუჭერს თუ არა მხარს საკანონმდებლო ორგანო ცვლილებას სამივე მოსმენით. - შეუძლებელია.

„პოლიტიკა ისეთი სფეროა, სადაც არასდროს არ უნდა თქვა „არასდროს“. ვიტყვი, რომ საკონსტიტუციო ცვლილება გავიდა, როდესაც სამივე მოსმენა დასრულდება და ცვლილებები შევა კონსტიტუციაში“ - განაცხადა ზვიად ძიძიგურმა.

პარლამენტის რიგგარეშე სხდომაზე დღეს, საკონსტიტუციო ცვლილებებს კენჭს პირველი მოსმენით უყრიან. კანონპროექტის მიხედვით, 2020 წლის საპარლამენტო არჩევნები შერეული სისტემით ჩატარდება, რაც იმას ნიშნავს, რომ პარლამენტში აირჩევენ 120 წევრს პროპორციული და 30 წევრს მაჟორიტარული საარჩევნო სისტემით.

ცვლილებების თანახმად, პროპორციული არჩევნები ჩატარდება ერთპროცენტიანი საარჩევნო ბარიერით, საარჩევნო ბლოკებისთვის კი ბარიერი განისაზღვრება ერთი პროცენტისა და ბლოკში შემავალი პარტიების ნამრავლით. ასევე, გაუნაწილებელი მანდატები, თუ ასეთი იქნება, თანმიმდევრობით განაწილდება უდიდესი ნაშთის მქონე პარტიებზე და ბლოკებზე.

პროექტით გათვალისწინებულია ე.წ. ჩამკეტი მექანიზმიც, კერძოდ, პარტია, რომელიც 2020 წლის საპარლამენტო არჩევნებზე პროპორციული სისტემით 40.54%-ზე ნაკლებ მხარდაჭერას მიიღებს, მთავრობას დამოუკიდებლად ვერ ჩამოაყალიბებს.