არჩილ თალაკვაძე: არჩევნების თარიღი არის ძალაში და ჩვენ მაქსიმალურად უზრუნველვყოფთ საარჩევნო კამპანიის ჩატარების შესაძლებლობას

საყოველთაო განხილვის დროს ბევრი მოქალაქე ინტერესდებოდა, როგორ იქნება ფორმირებული მაჟორიტარული ოლქები. ამის შესახებ პარლამენტის თავმჯდომარემ პარლამენტის რიგგარეშე სხდომაზე განაცხადა, რომელზეც საკონსტიტუციო ცვლილებებს პირველი მოსმენით უყრიან კენჭს.

ასევე - როგორ შეძლებენ მომავალში მაჟორიტარული წესით არჩეული ადამიანები თავისი ოლქის წარმომადგენლობის უზრუნველყოფას და როგორ უნდა მიიტანონ მათ პარლამენტამდე ყველა ის საკითხი, რომელიც უკვე გამსხვილებული ოლქების ფარგლებში დააინტერესებთ მოქალაქეებს.

არჩილ თალაკვაძის განცხადებით, მოქალაქეები ასევე სვამდნენ კითხვებს არჩევნებში მონაწილეობის ვალდებულებასთან დაკავშირებით.

„მოქალაქეებს ასევე აინტერესებდათ, როგორ იქნება უზრუნველყოფილი საპარლამენტო არჩევნების ჩატარება მაშინ, როდესაც მსოფლიოში გლობალური პანდემია ისევ მიმდინარეობს და სამწუხაროდ, მოქალაქეები კვლავ ინფიცირებულები არიან - მსოფლიოში ჯერ კიდევ რჩება რისკი, რამდენად იქნება კოვიდის მართვა და დამარცხება შესაძლებელი.

ზუსტად ჩვენი მოწვევის პარლამენტმა დააკონკრეტა კონსტიტუციაში საპარლამენტო არჩევნების ჩატარების თარიღი, რადგან არ ყოფილიყო პოლიტიკური სპეკულაციები. არჩევნების თარიღი დაფიქსირებულია კონსტიტუციაში და ეს არის 31 ოქტომბერი. წინა რედაქცია ვადების მანევრირების შესაძლებლობას იძლეოდა. დღეს ეს შესაძლებლობა არ არის. კომისიის მუშაობის ფარგლებში, არჩევნების თარიღის ცვლილების საკითხი არც ერთხელ არ ყოფილა დასმული.

არც ასეთი ინიციატივა ყოფილა, მით უმეტეს რაიმე გადაწყვეტილება. შესაბამისად, არჩევნების თარიღი არის ძალაში და ჩვენ მაქსიმალურად უზრუნველვყოფთ პოლიტიკური საარჩევნო კამპანიის ჩატარების შესაძლებლობას და დემოკრატიული-გამჭვირვალე არჩევნების ჩატარების შესაძლებლობას. ჩვენს მოქალაქეებს და პარტნიორებს დავუმტკიცებთ, რომ ვაგრძელებთ დემოკრატიის გაძლიერებას“, - აღნიშნა არჩილ თალაკვაძემ.

პარლამენტის რიგგარეშე სხდომაზე დღეს, საკონსტიტუციო ცვლილებებს კენჭს პირველი მოსმენით უყრიან. კანონპროექტის მიხედვით, 2020 წლის საპარლამენტო არჩევნები შერეული სისტემით ჩატარდება, რაც იმას ნიშნავს, რომ პარლამენტში აირჩევენ 120 წევრს პროპორციული და 30 წევრს მაჟორიტარული საარჩევნო სისტემით.

„ნაციონალური მოძრაობა“ საკონსტიტუციო ცვლილებების განხილვაში არ მონაწილეობს.

სხდომაზე არიან „ევროპული საქართველოს“ წევრები. პარტიის ლიდერების თქმით, პროექტის მეორე და მესამე მოსმენით განხილვაში მათი მონაწილეობა იმაზე იქნება დამოკიდებული, გათავისუფლდება თუ არა გიორგი რურუა.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.