თამარ ჩუგოშვილი საკონსტიტუციო ცვლილებების კენჭისყრაზე: იმედს ვიტოვებ, რომ აღარ განმეორდება ის, რაც 14 ნოემბერს მოხდა

იმედს ვიტოვებ, რომ აღარ განმეორდება ის, რაც 14 ნოემბერს მოხდა. ეს იყო შეცდომა და დანაშაული ქვეყნის წინაშე. იმედია, მეორედ არ აღმოვჩნდებით ამ სიტუაციაში, - ამის შესახებ დამოუკიდებელმა დეპუტატმა, თამარ ჩუგოშვილმა პარლამენტის რიგგარეშე სხდომაზე განაცხადა.

„საკონსტიტუციო ცვლილებები და საარჩევნო სისტემა არაა ვიღაცის ახირება. ესაა ქვეყნის მართვის ფორმა. ეს ქვეყანა ათწლეულებია, აკეტილ წრეზე დადის, სადაც ერთპარტიული სისტემა, ერთპიროვნული მმართველობაა, იგნორირებულია მოსახლეობის უდიდესი ნაწილის აზრი. განსხვავებული აზრის ქონა ითვლება მტრობად და გაერთიანების ნაცვლად, ქვეყანა დაყოფისა და შიდა მტრობისკენ მიდის. ამ ქვეყანას აქვს პოტენციალი, რომ განვითარდეს, წავიდეს წინ, განიცადოს პროგრესი, იყოს განვითარებული, შემდგარი სახელმწიფო და ზუსტად არსებული მართვის ფორმა უშლის მას ხელს იმაში, რომ ასეთად იქცეს. დიდი იმედი მაქვს, რომ დღეს და მომდევნო კვირებში, მეორე, მესამე მოსმენაზე ამ მანკიერ წრეს გავარღვევთ და შევცვლით მმართველობის მანკიერ ფორმას. დიდ მადლობას ვუხდი ამ ქვეყნის მეგობრებს, პარტნიორებს, რომელთაც იმაზე უფრო მნიშვნელოვანი როლი შეასრულეს ქვეყნის სტაბილურ განვითარებაში, ვიდრე, სამწუხაროდ, ამ ქვეყნის პოლიტიკურმა ელიტამ“ - განაცხადა თამარ ჩუგოშვილმა.

2019 წლის 14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა.

საქართველოს პარლამენტში რიგგარეშე სხდომა მიმდინარეობს, რომელზეც საკონსტიტუციო ცვლილებებს პირველი მოსმენით განიხილავენ. სხდომას 120 დეპუტატი ესწრება.

კანონპროექტის მიხედვით, 2020 წლის საპარლამენტო არჩევნები შერეული სისტემით ჩატარდება, რაც იმას ნიშნავს, რომ პარლამენტში აირჩევენ 120 წევრს პროპორციული და 30 წევრს მაჟორიტარული საარჩევნო სისტემით.

ცვლილებების თანახმად, პროპორციული არჩევნები ჩატარდება ერთპროცენტიანი საარჩევნო ბარიერით, საარჩევნო ბლოკებისთვის კი ბარიერი განისაზღვრება ერთი პროცენტისა და ბლოკში შემავალი პარტიების ნამრავლით. ასევე, გაუნაწილებელი მანდატები, თუ ასეთი იქნება, თანმიმდევრობით განაწილდება უდიდესი ნაშთის მქონე პარტიებზე და ბლოკებზე.

პროექტით გათვალისწინებულია ე.წ. ჩამკეტი მექანიზმიც, კერძოდ, პარტია, რომელიც 2020 წლის საპარლამენტო არჩევნებზე პროპორციული სისტემით 40.54%-ზე ნაკლებ მხარდაჭერას მიიღებს, მთავრობას დამოუკიდებლად ვერ ჩამოაყალიბებს.

„აღნიშნული ზღვარი ერთპარტიული საპარლამენტო უმრავლესობის ფორმირებას გამორიცხავს იმ შემთხვევაში, თუ გამარჯვებული პარტია ან საარჩევნო ბლოკი პროპორციული სისტემით ხმათა 40.54%- ზე ნაკლებს მიიღებს; ზემოხსენებული მარჟის გადაჭარბების შემთხვევაში, პარტიას ან საარჩევნო ბლოკს მოაკლდება მანდატები პროპორციული საარჩევნო სიიდან, რომლებიც პროპორციულად განაწილდება იმ სხვა პოლიტიკური პარტიებისა და საარჩევნო ბლოკების მიერ წარდგენილ საარჩევნო სიებზე, რომლებმაც შესაბამისი საარჩევნო ბარიერი გადალახეს“, - წერია კანონპროექტში.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.