გიორგი ვოლსკი: მთავარი ვისთანაც პასუხს ვაგებთ და ანგარიშვალდებული ვართ, ჩვენი საზოგადოებაა

ოპოზიციასთან პოლარიზაციის პროცესი, საშუალებას არ გვაძლევს, რომ რაღაცაზე შევთანხმდეთ ხელშემწყობების გარეშე, მაგრამ მთავარი ვისთანაც პასუხს ვაგებთ, ვისთანაც ანგარიშვალდებული ვართ, ხომ ჩვენი საზოგადოებაა, - ამის შესახებ პარლამენტის თავმჯდომარის პირველმა მოადგილემ, გიორგი ვოლსკიმ ტელეკომპანია „იმედის“ ეთერში, გადაცემა „დღის ქრონიკაში“ განაცხდა.

მისი თქმით, პოლიტპარტიების მთავარი თემა უნდა იყოს საზოგადოება და არა სხვადასხვა თემებით მანიპულირება. „საზოგადოების წინაშე ანგარიშვალდებულებაა თემა და არა ის, რომ მანიპულირებ და ამბობს (გიორგი რურუაა) პოლიტიკური პატიმარი, ეს იმას ნიშნავს, რომ პერსპექტივა არ გაქვს საზოგადოებას უკეთესი კუთხიდან დაანახო შენი თავი. რადიკალურ ზომებს იმიტომ მიმართავ, რომ იქნებ დასავლეთიდან ყურადღება მოგაქციონ, რომ თურმე საქართველოში პოლიტიკური პატიმარი ყოფილა და თანაც ხელისუფლებას შეუძლია მითითება მისცეს სასამართლოს და გამოაშვებინოს“, - აღნიშნა ვოლსკიმ.

ვოლსკის განცხადებით, ოპოზიცია სხვადასხვა წერტილოვან დარტყმებს იყენებს დესტრუქციის მისაღწევად. „თუმცა ვერცერთი მიმართულებით ვერ განავითარეს ეს დესტრუქციული გეგმა. მათ შორისაა ბიძინა ივანიშვილის ოჯახზე შეტევა. ბიძინა ივანიშვილმა ამას უპასუხა ქუთაისის ტექნოლოგიური უნივერსიტეტის გახსნით და დაანახა საზოგადოებას, რომ მმართველი გუნდი ფარდის მიღმიდან მართვას არ საჭიროებს“, განაცხადა ვოლსკიმ.

მისი თქმით, მდგომარეობა უმძიმესია, თუმცა ოპოზიციამ ვერც პანდემიის თემა გამოიყენა თუმცა ცდილობს მდგომარების დრამატიზირებას. „ოპოზიციის მიზანია აჩვენოს, რა საშინელება ხდება ... გიორგი რურუა არის პოლიტიკური პატიმარი და ესენი იძულებული არიან არ მიიღონ მონაწილეობა კენჭისყრაში. თან ჩვენ ხელს გვიქნევენ და გვეუბნებიან, რომ არ ჩავაგდოთ საკონსტიტუციო ცვლილებები“, აღნიშნა ვოლსკიმ.

პარლამენტმა საკონსტიტუციო ცვლილებებს კენჭი მესამე მოსმენით დაამტკიცა. კანონპროექტს მხარი დაუჭირა 117-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 120-მა დეპუტატმა. კენჭისყრაში „ნაციონალური მოძრაობა“ და ევროპული საქართველო“ არ მონაწილეობდა.