ლუიზა ვინტონი ოკუპანტების მიერ საქართველოს მოქალაქის დაკავებაზე: ძალიან სამწუხაროა, რომ ბოლო თვეების განმავლობაში ასეთი შემთხვევების რაოდენობა გაიზარდა

ძალიან სამწუხაროა, რომ ბოლო თვეების განმავლობაში ასეთი შემთხვევების რაოდენობა გაიზარდა - ამის შესახებ საქართველოში გაეროს განვითარების პროგრამის ხელმძღვანელმა, ლუიზა ვინტონმა ოკუპანტების მიერ საქართველოს მოქალაქის დაჭრისა და დაკავების ფაქტის შეფასებისას განაცხადა.

მისი თქმით, ის იმედოვნებს, რომ ასეთ შემთხვევებს სწრაფად გამოიძიებენ.

„ასეთ შემთხვევებზე კომენტარები უნდა გააკეთონ ჟენევის დისკუსიების თანათავმჯდომარეებმა, გაერომ მთლიანად. გაეროს განვითარების პროგრამის სახელით, რომელიც, რა თქმა უნდა, გაეროს ოჯახის ნაწილია და ჩვენც ვაკვირდებით მოვლენებს დიდი ყურადღებით, ხანდახან შეშფოთებით და მინდა გითხრათ, რომ ძალიან სამწუხაროა, რომ ბოლო თვეების განმავლობაში ასეთი შემთხვევების რაოდენობა გაიზარდა. ჩვენ კიდევ ერთხელ გვინდა დავაფიქსიროთ მოსაზრება, რომ ადამიანის უფლებები უმნიშვნელოვანესია, ისევე როგორც გადაადგილების თავისუფლება. ამიტომ დიდი იმედი გვაქვს, რომ ასეთი შემთხვევები ძალიან სწრაფად და ეფექტურად იქნება გამოძიებული", - განაცხადა ლუიზა ვინტონმა.

ოკუპანტებმა ზაზა გახელაძე 11 ივლისს დაჭრეს და დააკავეს. ოჯახის წევრების ინფორმაციით, ის ახალგორიდან ცხინვალში გადაიყვანეს.

ბოლო წლების განმავლობაში ეს პირველი შემთხვევაა, როდესაც დაკავების დროს მშვიდობიანი მოქალაქის წინააღმდეგ საოკუპაციო რეჟიმმა ცეცხლსასროლი იარაღი გამოიყენა. კაცი ფეხშია დაჭრილი. საოკუპაციო ხაზთან მომხდარ ინციდენტთან დაკავშირებით ინფორმირებულია ევროკავშირის სადამკვირვებლო მისია. ამოქმედებულია ცხელი ხაზი.