ირაკლი კობახიძე: პარლამენტში ჩვენი სიით, ყველაზე მეტი ქალი იქნება წარმოდგენილი

„როდესაც გადიხარ თითოეულ მაჟორიტარულ ოლქს გენდერული კვოტის დაცვა შეუძლებელია, თუმცა ჩვენ ავიღეთ პასუხისმგებლობა და პრ​ოპორციული სიის ნაწილში, „ქართული ოცნების“ ინიციატივით, შემოვიღეთ გენდერული კვოტა, რომელიც უზრუნველყოფს იმას, რომ პარლამენტში, მთლიანად, სულ მცირე 30 ქალი იქნება წარმოდგენილი, - ამის შესახებ ტელეკომპანია „იმედის“ გადაცემა „დღის ქრონიკაში“ „ქართული ოცნების“ ერთ-ერთმა ლიდერმა ირაკლი კობახიძემ განაცხადა.

ირაკლი კობახიძის განცხადებით, „ქართული ოცნების“ საპარლამენტო სია, გენდერულად დაბალანსებული იქნება. „რაც შეეხება „ქართულ ოცნებას“ ამ მხრივ ყველაზე მეტი ქალი პარლამენტში იქნება ჩვენი წარმომადგენელი. შესაბამისად, ჩვენ ავიღეთ ამაზე პასუხისმგებლობა და ეს იყო ჩვენი ინიციატივა. ასევე შეგახსენებთ, რომ ამ ინიციატივას მხარი არ დაუჭირეს ოპოზიციის წარმომადგენლებმა, რომლებიც დღეს სპეკულირებენ ამ თემასთან დაკავშირებით. საქართველოს პარლამენტი გაძლიერდება ქალთა წარმომადგენლობის კუთხით და ეს იქნება ჩვენი ინიციატივის, გენდერული კვოტირების დამსახურება. ეს ხელს შეუწყობს საქართველოს პარლამენტის გაძლიერებას, განვითარებას და ზოგადად გენდერული თანასწორობის კუთხით, უკეთესი მდგომარეობის ჩამოყალიბებას“, - განაცხადა კობახიძემ.

მისი თქმით, „ქართული ოცნება“ საზოგადოებას პარტიის პროპორციულ სიას ეტაპობრივად წარუდგენს.„ჩვენ ეტაპობრივად წარვუდგენთ პროპორციულ საარჩევნო სიას, სადაც იქნება ძალიან ბევრი ახალი სახე. „საარჩევნო სიაში იქნებიან ჩვენი გუნდის გამოცდილი წევრები და ა​სევე ახალი სახეები. ესაა ჩვენი პასუხისმგებლობა, საზოგადოების წინაშე. ჩვენ ეტაპობრივად შევთავაზებთ დადებით, პოზიტიურ სიურპრიზებს საზოგადოებას“, - აღნიშნა კობახიძემ.

„ქართულმა ოცნებამ“ მაჟორიტარი დეპუტატობის კანდიდატები დღეს წარადგინა.