ირაკლი კობახიძე: ჩვენი საარჩევნო დაპირებები იქნება ამბიციური და ამავდროულად რეალისტური

„ქ​ართული ოცნების“ გამოწვევა არაა ოპოზიცია, ჩვენი გამოწვევაა ის პრობლემები, რომლებიც არის საზოგადოებაში და საჭიროებს თანდათანობით აღმოფხვრას. ჩვენ ვმუშაობთ, რომ წარვადგინოთ კონკრეტული საარჩევნო პროგრამა, - ამის შესახებ ტელეკომპანია „იმედის“ გადაცემა „დღის ქრონიკაში“ „ქართული ოცნების“ ერთ-ერთმა ლიდერმა ირაკლი კობახიძემ განაცხადა.

„ჩვენ 2016 წელს საზოგადოებას წარვუდგინეთ ძალიან დახვეწილი საარჩევნო პროგრამა. იგივე ხდებოდა 2017 წელს, როცა თითოეული მუნიციპალიტეტის შემთხვევაში, შემუშავდა საარჩევნო პროგრამა, სადაც დეტალურად იყო აღწერილი თუ რას ვაპირებდით ჩვენ მომდევნო 4 წლის განმავლობაში.

ამ შემთხვევაშიც მ​ზადდება საარჩევნო პროგრამა, რომელსაც დეტალურად წარვუდგენთ ქართულ საზოგადოებას. ეს პროგრამა ბუნებრივია მოიცავს, ჩვენი ქვეყნის განვითარების ყველა ასპექტს. ეს არის ადამიანის უფლებები, დემოკრატია, ეკონომიკა, სოციალური საკითხები. ასევე ეს არის განათლების თემა, საგარეო უსაფრთხოების და თავდაცვის საკითხები.

დაპირებები იქნება ძალიან კონკრეტული. დაპირებები იქნება ერთი მხრივ ა​მბიციური და ამავდროულად რეალისტური. ჩვენ პასუხისმგებლობას ავიღებთ იმაზე, რომ მომდევნო ოთხი წლის განმავლობაში თითოეული ეს დაპირება შესრულდება“, - განაცხადა კობახიძემ.

მისი თქმით, „ქართული ოცნების“პასუხისმგებლობის ხარისხი 2016-2017 წლის საარჩევნო პროგრამების წარდგენის დროსაც იყო ძალიან მაღალი და დღესაც ასე იქნება.

„ქართულმა ოცნებამ“ მაჟორიტარი დეპუტატობის კანდიდატები დღეს წარადგინა.