ირაკლი კობახიძე: რადიკალური ოპოზიცია, „ნაციონალური მოძრაობა“ სასოწარკვეთილებაშია გადავარდნილი

საპარლამენტო უმრავლესობის წევრმა ირაკლი კობახიძემ წინა ხელისუფლების და „ქართული ოცნების“ მმართველობის შედეგები შეადარა და აღნიშნა, რომ თუ ყველა მიმართულებით ვიმსჯელებთ, საზოგადოებას ექნება მყარი იმედი იმისა, რომ წინსვლა და განვითარება მომდევნო 4 წლის განმავლობაშიც გაგრძელდება.

მისი თქმით, სწორედ ეს გახდება იმის საფუძველი, რომ „ქართული ოცნება“ მომდევნო არჩევნებში დამაჯერებლად მოიგებს.

„ავიღოთ 9-წლიანი მმართველობის შედეგები და ჩვენი, 8-წლიანი მმართველობის შედეგები. საგარეო პოლიტიკა და უსაფრთხოების საკითხები: წინა ხელისუფლების პოლიტიკის შედეგი იყო, რომ ტერიტორიების 20% რუსეთის ფედერაციას ჩააბარეს.

რაც შეეხება „ქართულ ოცნებას“, ჩვენ, მაქსიმალურად ვაკეთებთ ყველაფერს, რომ შევინარჩუნოთ სტაბილურობისა და უსაფრთხოების მაღალი ხარისხი და ეს ხარისხი მაქსიმალურად არის შეცვლილი 2008 და 2012 წელთან შედარებით.

ასევე - ჩვენი ქვეყანა წინ მიიწევს ევროკავშირისა და ნატოს მიმართულებით და ამისა დასტურია ასოცირების შეთანხმებაზე ხელმოწერა, ვიზალიბერალიზაცია და ნატოში ინტეგრაციის მიმართულებით მუდმივი წინსვლა.

რაც შეეხება ეკონომიკას, მათ ეკონომიკის 34%-იანი მაჩვენებლიდან მხოლოდ 30%-მდე შემცირება მოახერხეს, მაშინ, როდესაც ჩვენ 30-დან 18-ნახევარ პროცენტზე ჩამოვედით. სოციალური ბიუჯეტი კი გაორმაგდა, იგივე ეხება განათლების ბიუჯეტს. რაც შეეხება დემოკრატიას, თავისუფლებას და ადამიანის უფლებებს, ამაზე საერთოდ არ ღირს საუბარი - თქვენ იცით, რა ხდებოდა მაგალითად პენიტენციურ სისტემაში და რა მდგომარეობა გვაქვს დღეს ამ სფეროში.

რაც შეეხება მედიას, 2012 წლამდე სატელევიზიო სივრცე პრაქტიკულად მთლიანად იყო მონოპოლიზებული მაშინდელი ხელისუფლების მიერ, დღეს გვაქვს პლურალისტული გარემო, რომლის ბოროტად გამოყენების ფაქტებს ვხედავთ.

ეს ძალიან სამწუხაროა, თუმცა კიდევ ერთხელ აჩვენებს იმას, რომ რადიკალური ოპოზიცია, „ნაციონალური მოძრაობა“ სასოწარკვეთილებაშია გადავარდნილი და ამის შედეგია, რომ მათი მედიის მხრიდანაც ვხედავთ ყოველდღიურ პროვოკაციებს.

ჩვენ შეგვიძლია, კიდევ ერთხელ მოვუწოდოთ მათ, რომ ნუ წავლენ ასეთ მძიმე პროვოკაციებზე, მათ შორის გუშინ იყო საკმაოდ მძიმე პროვოკაცია ერთ-ერთ ტელევიზიაში, რომელიც ეკუთვნის „ნაციონალურ მოძრაობას“. მოვუწოდებდით, მაგრამ დიდი ოპტიმიზმის საფუძველი არ გვაქვს, რადგან მათი მხრიდან მუდმივ პროვოკაციებს მიჩვეული ვართ“, - განაცხადა გადაცემაში „დღის ქრონიკა“ ირაკლი კობახიძემ.