ირაკლი კობახიძე: გაორმაგებული ენერგიით გვჭირდება მუშაობის გაგრძელება, რათა საბოლოოდ მივაღწიოთ მიზნებს - მათ შორის არის პანდემიიდან გამომდინარე შესუსტებული ეკონომიკის აღორძინება

„გაორმაგებული ენერგიით გვჭირდება მუშაობის გაგრძელება, რათა საბოლოოდ მივაღწიოთ ქვეყნის წინაშე არსებულ მიზნებს. მათ შორის, ერთ-ერთი მთავარი ამოცანაა, პანდემიიდან გამომდინარე შესუსტებული ეკონომიკის აღორძინება“, - ამის შესახებ „ქართული ოცნების“ აღმასრულებელმა მდივანმა ირაკლი კობახიძემ გადაცემაში „დღის ქრონიკა“ განაცხადა.

„რა თქმა უნდა, ხელისუფლება უნდა იყოს ეფექტიანი და მზრუნველი, ეს არის საზოგადოების მოლოდინი. სწორედ ასეთად წარმოჩნდა ხელისუფლება განსაკუთრებით ამ მძიმე ვითარებაში, რასაც ჰქვია პანდემიის წინააღმდეგ ბრძოლა. თვეების განმავლობაში ყველაფერი გაკეთდა იმისთვის, რომ ხელისუფლება ყოფილიყო ეფექტიანი ამ ბრძოლაში და გვეზრუნა თითოეულ ჩვენს მოქალაქეზე.

თუმცა ეს არ იყო მხოლოდ პანდემიისთვის დამახასიათებელი პრობლემა, ჩვენ ვფიქრობთ, რომ „ქართული ოცნება“ სწორედ ამით არის გამორჩეული, რომ ორიენტირებულია ადამიანის საჭიროებებზე და ყველაფერი კეთდება იმისთვის, რომ ქვეყანა მაქსიმალურად წინ წავწიოთ.

თუმცა რესურსები არ არის ამოუწურავი და ბუნებრივია, გაორმაგებული ენერგიით გვჭირდება მუშაობის გაგრძელება, რათა საბოლოოდ მივაღწიოთ ქვეყნის წინაშე არსებულ მიზნებს. მათ შორის, ერთ-ერთი მთავარი ამოცანაა, პანდემიიდან გამომდინარე შესუსტებული ეკონომიკის აღორძინება.

ჩვენი საბოლოო ამოცანაა სიღარიბის ბოლომდე აღმოფხვრა. ეს იქნება ის თემები, რომლებზეც საზოგადოებას უნდა ვესაუბროთ - საზოგადოება დაიღალა იმ პოლიტიკური კინკლაობით, რომელიც პოლიტიკოსებს შორის მუდმივად ჩანს.

ეს არ აინტერესებს საზოგადოებას - მას აინტერესებს, როგორი გეგმით წარდგება პოლიტიკური პარტია მის წინაშე, შესაბამისად, ჩვენი პასუხისმგებლობაა, წარვადგინოთ ჩვენი ხედვები, კონკრეტული გეგმები და სწორედ ეს უნდა გახდეს იმის საფუძველი, რომ საზოგადოების და ამომრჩევლის მხარდაჭერა მივიღოთ.

ეს იქნება ჩვენი კამპანიის მთავარი ხაზი და ჩვენ დღესაც აღვნიშნეთ, რომ პასუხისმგებლობას ვიღებთ ამ არჩევნების თავისუფალ და სამართლიან გარემოში ჩატარებაზე“, - განაცხადა ირაკლი კობახიძემ.

„ქართულმა ოცნებამ“ დღეს მაჟორიტარი დეპუტატობის კანდიდატები წარადგინა.