ირაკლი კობახიძე: საზოგადოების წინაშე ღირსეული კანდიდატებით წარვდექით, რაც იქნება წინაპირობა, რომ „ქართული ოცნება“ არჩევნებს დამაჯერებლად მოიგებს

გარდა მაჟორიტარების წარდგენისა, ეს იყო კამპანიის გახსნის ღონისძიება. დღეიდან ჩვენ სრულმასშტაბიან საარჩევნო კამპანიაზე გადავდივართ. ამ კუთხით მნიშვნელოვანი იყო დაგვესახელებინა ოცდაათივე მაჟორიტარულ ოლქში კანდიდატები. ბუნებრივია ეს არის პირველი განაცხადი, რომელიც გაკეთდა საზოგადოების წინაშე, - ამის შესახებ ტელეკომპანია „იმედის“ გადაცემა „დღის ქრონიკაში“ „ქართული ოცნების“ ერთ-ერთმა ლიდერმა ირაკლი კობახიძემ განაცხადა.

მისი თქმით, „ქართულმა ოცნებამ“ მაჟორიტარები პასუხისმგებლობით შეარჩია. „შესაბამისად, ჩვენ ბუნებრივია პასუხისმგებლობით მოვეკიდეთ ოცდაათივე დეპუტატების კანდიდატების შერჩევას და კრიტერიუმები იყო ობიექტური. ეს იყო რა თქმა უნდა კავშირი მოსახლეობასთან, რეგიონში მათი ცნობადობა, მათი საარჩევნო რესურსი. ეს იყო ბუნებრივია მათი პროფესიონალიზმი, კვალიფიკაცია და კეთილსინდისიერება. სწორედ ამ კრიტერიუმების მიხედვით შეირჩნენ მაჟორიტარი დეპუტატების კანდიდატები. ვფიქრობ, რომ ოცდაათივე შემთხვევაში ჩვენ გავაკეთეთ სწორი არჩევანი. ჩვენ საზოგადოების წინაშე ღირსეული კანდიდატებით წარვდექით და ესეც იქნება წინაპირობა იმისა, რომ „ქართული ოცნება“ დამაჯერებლად მოიგებს ოქტომბრის არჩევნებს“, - განაცხდა ირაკლი კობახიძემ.

მისი თქმით, „ქართულ ოცნებას“ აქვს ამბიცია, რომ მაჟორიტარული ოლქები, საპარლამენტო არჩევნების პირველ ტურშივე მოიგოს. „ჩვენ გვაქვს იმის ამბიცია ოცდაათივე მაჟორიტარულ ოლქში თუ არა, უმეტეს შემთხვევაში პირველივე ტურში მოვიგოთ მაჟორიტარული არჩევნები. დღეს არის ამის ყველა წინაპირობა, დანარჩენი დამოკიდებულია ჩვენს ყოველდღიურ მუშაობაზე“, - აღნიშნა კობახიძემ.

„ქართულმა ოცნებამ“ მაჟორიტარი დეპუტატობის კანდიდატები წარადგინა.