გიორგი გახარია თამარ ბაჩალიაშვილის გარდაცვალების საქმეზე საზოგადოების ინფორმირების კუთხით შსს-ს პროაქტიურობისკენ მოუწოდებს

პრემიერ-მინისტრმა თამარ ბაჩალიაშვილის გარდაცვალების საქმეზე შსს-ს საზოგადოების პროაქტიური ინფორმირება დაავალა. საზოგადოების ინფორმირებულობის მნიშვნელობაზე პრემიერმა მთავრობის სხდომაზე ისაუბრა.

„შსს-ს კიდევ ერთხელ მინდა დავავალო, მოქალაქეების პროაქტიული ინფორმირება. ეს არის უკიდურესად მნიშვნელოვანი, რათა არ დარჩეს არც ერთი სივრცე იმისთვის, რომ ზოგიერთმა გამოიყენოს ეს გარკვეული სპეკულირებისთვის.

რა თქმა უნდა, პირველ რიგში სწრაფი, ეფექტური გამოძიება, მაგრამ ამასთან ერთად, დღეს ყველაზე მნიშვნელოვანი ხდება პროაქტიური ინფორმირებულობა პირველ რიგში ოჯახის და შემდეგ საზოგადოების.

ჩვენ ყველამ კარგად ვიცით გამოძიებასთან დაკავშირებული პრობლემები, რომელიც ქვეყანაში არსებობს და სწორედ ამიტომ დაიწყო რეფორმები და სისტემური განახლება შსს-ში და ამ ნაბიჯებს აქვს უკიდურესად დიდი მნიშვნელობა როგორც ქვეყნისთვის, ასევე რიგითი კეთილსინდისიერი პოლიციელებისთვის, რომლებიც ყოველდღიურად კეთილსინდისიერად ასრულებენ თავის მოვალეობას. ეს უნდა გავითვალისწინოთ ყველამ, პირველ რიგში შინაგან საქმეთა სამინისტრომ.

„ამ თემაზე საუბრების დასრულებისთვის თითოეულ საგამოძიებო სტრუქტურას კიდევ ერთხელ მოგიწოდებთ, იყოთ პროაქტიური ინფორმაციის გაზიარებისთვის, რათა არ დავტოვოთ მცირედი სივრცეც ინტერპრეტირებისთვის. დღეს ჩვენ ეს არ გვჭირდება იმიტომ, რომ ძალზედ მნიშვნელოვანია ეფექტური გამოძიება და მოქალაქეების ინფორმირებულობა“, - აღნიშნა პრემიერმა.

23 წლის თამარ ბაჩალიაშვილი თეთრიწყაროს ტყეში გარდაცვლილი იპოვეს. ოჯახის ადვოკატის, მიხეილ რამიშვილის განცხადებით, საქმეში დამოუკიდებელი ექსპერტიც ჩაერთვება.

თბილისში, ქვემო ფონიჭალაში მცხოვრები თამარ ბაჩალიაშვილი ვიდეოკამერებმა ბოლოს სოფელ ხაიშთან დააფიქსირეს. გოგო ნაცრისფერი ჰუნდაის მარკის მანქანით გადაადგილდებოდა.