თეა წულუკიანი: უკრაინული მედია ღიად საუბრობს იმაზე, რომ მათ რეფორმატორების ნაცვლად ხელში კრიმინალები შერჩათ

დასანანია, რომ უკრაინა, ისევე როგორც ჩვენ თავის დროზე, კარგავს დროს „რეფორმატორებზე“, როგორც ეს ქართველმა ხალხმა დაკარგა. დარწმუნებული ვარ, რომ მალე უკრაინელი ხალხი მათ ჩამოიცილებს. სააკაშვილს და მის რეფორმატორ მოადგილეს - ადეიშვილს საქართველოში დაბრუნება მოუწევთ. არაა გამორიცხული, რომ ეს არა ექსტრადირების, არამედ დეპორტაციის გზით მოხდეს, და როგორც ახლა დავით ჭაკუა იხდის სასჯელს, მათაც მოუწევთ პასუხისგება ქართული მართლმსაჯულების წინაშე, - ამის შესახებ ტელეკომპანია „იმედის“ გადაცემაში „ღია ეთერი“ იუსტიციის მინისტრმა, თეა წულუკიანმა განაცხადა.

„თუ გავიხსენებთ 2013-2014 წლებს და შემდგომ პერიოდს, მაშინ ჩვენს ქვეყანაში ისმოდა ლეგიტიმური კითხვა, რომელზეც ხშირად ჩემთვის და არა მხოლოდ ჩემთვის რთული იყო პასუხის გაცემა. კითხვა იყო ასეთი - თუ უკრაინაში იმყოფებიან ყოფილი მაღალჩინოსნები, რატომ ვერ ახერხებთ მეგობარი ქვეყნიდან მათ ექსტრადირებას? რა თქმა უნდა, ძალიან ძნელია უარყოფითი კომენტარების გაკეთება მეგობარ ქვეყანაში მიღებულ გადაწყვეტილებებზე, ამიტომ ჩვენი პასუხი ყოველთვის თავშეკავებული იყო. სხვა ტიპის პასუხი არც ახლაა საჭირო, მაგრამ განსხვავება ისაა, რომ არა მხოლოდ საქართველოში, არამედ უკრაინაშიც კი პრაქტიკულად ყველამ ყველაფერი დაინახა. კერძოდ, დაინახა ის, რომ მაშინ არავითარი პოლიტიკური ნება უკრაინაში არ არსებობდა, რომ შელეოდნენ ამ „რეფორმატორებს“. დღეს საქართველო და ქართველი ხალხი ხედავს, რომ ჩვენ არ დავაკელით ძალისხმევა, რომ ისინი აქ ჩამოგვეყვანა, მაგრამ როდესაც ადამიანი იმყოფება სხვა ქვეყანაში და ამ ქვეყანას არ სურს ეს ძებნილი გადმოგცეს, რამის გაკეთება რთულია. მით უმეტეს რომ შენ ორ ხალხს შორის ტრადიციული და ძირძველი მეგობრობის შენარჩუნება და გაძლიერება გსურს. ახლა უკვე უკრაინული მედია ღიად საუბრობს იმაზე, რომ რეალურად მათ რეფორმატორების ნაცვლად ხელში კრიმინალები შერჩათ. ეს ნამდვილად გულსატკენი ფაქტია, ვინაიდან ჩვენს ქვეყნებს ერთნაირი გამოწვევები, ერთნაირი ტრაგედიები წარსულში და მიმდინარე ოკუპაცია. დასანანია, რომ უკრაინა, ისევე როგორც ჩვენ თავის დროზე, კარგავს დროს „რეფორმატორებზე“, როგორც ეს ქართველმა ხალხმა დაკარგა. დარწმუნებული ვარ, რომ მალე უკრაინელი ხალხი მათ ჩამოიცილებს. სააკაშვილს და მის რეფორმატორ მოადგილეს - ადეიშვილს საქართველოში დაბრუნება მოუწევთ. არაა გამორიცხული, რომ ეს არა ექსტრადირების, არამედ დეპორტაციის გზით მოხდეს, და როგორც ახლა დავით ჭაკუა იხდის სასჯელს, მათაც მოუწევთ პასუხისგება ქართული მართლმსაჯულების წინაშე“, - განაცხადა წულუკიანმა.