არჩილ თალაკვაძე: რასაც მიხეილ სააკაშვილი აკეთებს, ეს უკვე წარსულია

რასაც მიხეილ სააკაშვილი აკეთებს, ეს არის უკვე წარსული და გასაკვირი არ არის, რომ ეს ოპოზიციურ პარტიებს შორის სამართლიან გაღიზიანებას იწვევს, - ამის შესახებ პარლამენტის თავმჯდომარემ, არჩილ თალაკვაძემ, ყოფილ პრეზიდენტ მიხეილ სააკაშვილზე საუბრისას განაცხადა.

მისივე თქმით, რაც შეეხება იმას, ვინ უფრო ნათელ მხარეს დგას – ვაშაძე თუ სააკაშვილი, ამის შეფასება საზოგადოებასა და პოლიტიკოსებს არ გაუჭირდებათ.

„აშკარაა, რომ მიხეილ სააკაშვილს კვლავ აქვს განცდა, რომ ის არის პოლიტიკური მონოპოლისტი. რეალურად, მისი მონოპოლია 2012 წელს დაიშალა და მისი პოლიტიკური კამპანია არის პოლიტიკური კრახის წინაშე. საპარლამენტო არჩევნებში კიდევ ერთხელ გამოჩნდება, რომ საზოგადოებას საქართველოში ახალი პოლიტიკური კლასი და პასუხისმგებლიანი პოლიტიკური პარტიები სურს, ისეთი, როგორიც არის „ქართული ოცნება“. ჩვენი მიზანია, რომ უფრო მონაწილეობითი პარლამენტი გვქონდეს, ასევე უფრო დაბალანსებული და შედეგზე ორიენტირებული პოლიტიკა გვქონდეს. შემიძლია ის ნაბიჯები გითხრათ, რომელიც სააკაშვილისგან განსხვავებით, როცა ის იყო ხელისუფლებაში, ჩვენ გადავდგით. შევცვალეთ პარტიების დაფინანსების სისტემა, მედიასაშუალებებს შეზღუდვები მოვუხსენით, რომელთა რაოდენობა ოთხიდან ოცამდე გაიზარდა ეროვნული მაუწყებლობის თვალსაზრისით. ასევე, შევცვალეთ საქართველოს კონსტიტუცია, შემოვიღეთ არსებითად პროპორციული სისტემა და სრულად პროპორციული სისტემა 2024 წლისთვის. აგრეთვე, შევცვალეთ, „საარჩევნო კოდექსი“. ეს არის რეალური ნაბიჯები დემოკრატიის გასაძლიერებლად. რასაც მიხეილ სააკაშვილი აკეთებს, ეს არის უკვე წარსული და გასაკვირი არ არის, რომ ეს ოპოზიციურ პარტიებს შორის სამართლიან გაღიზიანებას იწვევს. რაც შეეხება იმას, ვინ უფრო ნათელ მხარეს დგას – ვაშაძე თუ სააკაშვილი, ამის შეფასება საზოგადოებასა და პოლიტიკოსებს არ გაუჭირდებათ, რადგან პოლიტიკური სივრცე დღეს გახსნილია. ალბათ, მიხეილ სააკაშვილს სწორედ ეს აღიზიანებს“, – განაცხადა თალაკვაძემ.

საქართველოს ყოფილმა პრეზიდენტმა და უკრაინის რეფორმების აღმასრულებელი კომიტეტის თავმჯდომარემ, მიხეილ სააკაშვილმა „სტრატეგია აღმაშენებლის“ ლიდერი გიორგი ვაშაძე „ძალა ერთობაშიას“ დატოვების გადაწყვეტილების გამო გააკრიტიკა და განაცხადა, რომ გიორგი ვაშაძე ბნელ მხარეზე გადავიდა.