ნინო ბურჯანაძე: პირველად საქართველოს ისტორიაში 30-მა პარტიამ ხელი მოაწერა დეკლარაციას, რომ ერთმანეთის ხმებს დაიცავენ

ძალიან მნიშვნელოვნად მიმაჩნია, რომ მინიმუმ კოორდინირება შენარჩუნებულია, არ არის წინააღმდეგობა და საერთო კანდიდატები ოპოზიციამ თბილისი ყველა ოლქში დააყენა, - ამის შესახებ „ერთიანი საქართველო-დემოკრატიული მოძრაობის“ ლიდერმა, ნინო ბურჯანაძემ ჟურნალისტებს განუცხადა.

ნინო ბურჯანაძის თქმით, ოპოზიციის ხმების დაცვის დეკლარაციის მიღება საქართველოს ისტორიაში პირველად მოხდა და მას 30-მა პარტიამ მოაწერა ხელი.

„ძალიან მნიშვნელოვნად მიმაჩნია, რომ მინიმუმ კოორდინირება შენარჩუნებულია, არ არის წინააღმდეგობა და საერთო კანდიდატები ოპოზიციამ თბილისი ყველა ოლქში დააყენა. ეს ნიშნავს, რომ იქნება მართლაც თანამშრომლობა, რათა „ქართულმა ოცნებამ” ვერ შეძლოს მაჟორიტარული ოლქების მოგება. ოქრუაშვილი და ჯაფარიძე საერთო კანდიდატია, რაც ნიშნავს, რომ ამ კანდიდატებს ჩვენ მხარს ვუჭერთ. ასევე, ჩვენ ყველანაირად ვეცდებით, რომ შესრულდეს ის ღირსეული გადაწყვეტილება, რომელიც უპრეცედენტოა. ეს არის ოპოზიციის ხმების დაცვის დეკლარაცია. პირველად საქართველოს ისტორიაში 30-მა პარტიამ ხელი მოაწერა, რომ ერთმანეთის ხმებს დაიცავენ. არა მხოლოდ საკუთარი პარტიის, არამედ ერთმანეთის“, - განაცხადა ნინო ბურჯანაძემ.

„ლეიბორისტული პარტიის“ ოფისში დღეს გამართულ შეხვედრაზე ოპოზიციური პარტიების წარმომადგენლებმა საპარლამენტო არჩევნებზე ამომრჩეველთა ხმების ურთიერთდაცვის შესახებ დეკლარაცია მიიღეს. ამის შესახებ ლეიბორისტული პარტიის ლიდერმა, შალვა ნათელაშვილმა განაცხადა.