ანრი ოხანაშვილი: „პატრიოტთა ალიანსთან“ თანამშრომლობა ჩვენთვის წითელი ხაზია

ჩვენ არაერთხელ აღვნიშნეთ, რომ „პატრიოტთა ალიანსთან“ არანაირ თანამშრომლობას არ განვიხილავთ. ეს არის ჩვენთვის წითელი ხაზი. ჩვენ ყოველთვის ვიყავით და ვართ თანმიმდევრულნი. „ქართულ ოცნებას“ არ სჭირდება ისეთ ინტერესის მატარებელი ჯგუფი, რომელიც არ იცავს ჩვენი ქვეყნის ინტერესებს სათანადოდ“, - ამის შესახებ საპარლამენტო უმრავლესობის წევრმა, ანრი ოხანაშვილმა პარლამენტის პლენარულ სესიაზე განაცხადა.

მისივე თქმით, ის მიესალმება სახელმწიფო აუდიტის მიერ მოკვლევის დაწყებას „პატრიოტთა ალიანსის“ დაფინანსებასთან დაკავშირებით.

მან ასევე აღნიშნა, რომ გასარკვევია პარლამენტის წევრები როგორ აღმოჩნდნენ ოკუპირებულ აფხაზეთში.

ოხანაშვილის თქმით, რაც შეეხება „პატრიოტთა ალიანსის“ დამოკიდებულებას „ნაციონალური მოძრაობის“ მიმართ, ამაზე თუნდაც ის ფაქტი მეტყველებს, რომ მათ არ დაუჭირეს მხარი „ნაციონალური მოძრაობის“ იმ წევრის უფლებამოსილების შეჩერებას, რომელიც აქ შტურმით შემოვარდნას და სახელმწიფო ინსტიტუციის აღებას ცდილობდა.

„მე მივესალმები სახელმწიფო აუდიტის მიერ მოკვლევის დაწყებას დაფინანსებასთან დაკავშირებით, ასევე გასარკვევია მათი ვიზიტი ოკუპირებულ აფხაზეთში. ამ საკითხებს უნდა გაეცეს პასუხი. მე მქონდა მოლოდინი, რომ ბატონი გიორგი ლომია აქეთ იერიშზე კი არ გადმოვიდოდა და მიუღებელი ფორმით კოლეგების მიმართ შეურაცხყოფას კი არ დაიწყებდა, არამედ ახსნიდა პარლამენტის წევრები როგორ აღმოჩნდნენ კონკრეტულ ადგილას და რა მიზნით. ეს არის აუცილებლად გასარკვევი და ამას უნდა გაეცეს პასუხი. ასევე ბატონი ლომია რომ ამბობს იმას, რომ თურმე ისინი „ნაციონალურ მოძრაობასთან“ მიმართებაში ძალიან ხისტი პოზიციით გამოირჩევიან, ხომ არ შევახსენოთ „პატრიოტთა ალიანსს“ ის, რომ საქმე საქმეზე რომ მიდგა და ბატონი ნიკანორ მელიას უფლებამოსილების შეჩერების საკითხი განიხილებოდა, „პატრიოტთა ალიანსმა“, რომელიც ერთი მხრივ ამბობდა, რომ „ნაციონალური მოძრაობა“ უნდა გასამართლდეს, არ დაუჭირა მხარი „ნაციონალური მოძრაობის“ იმ წევრის უფლებამოსილების შეჩერებას, რომელიც აქ შტურმით შემოვარდნას და სახელმწიფო ინსტიტუციის აღებას ცდილობდა. ეს არის თქვენი თანამშრომლობა, ფაქტი და მოცემულობა“, - განაცხადა ანრი ოხანაშვილმა.​

რამდენად კანონიერად ფინანსდება „პატრიოტთა ალიანსი“ - ამ საკითხზე სახელმწიფო აუდიტის სამსახურმა პოლიტიკური პარტიის ფინანსური საქმიანობის შესწავლა დაიწყო. ირმა ინაშვილის პარტიას მაკონტროლებელმა ორგანომ ოფიციალური წერილით უკვე მიმართა. მოკვლევის პერიოდში აუდიტის სამსახური დეტალურად შეისწავლის პარტიის შემოსავლებსა და ხარჯებს და დარღვევების გამოვლენის შემთხვევაში საგამოძიებო უწყებას აცნობებს.

ერთი კვირის წინ, „ევროპული საქართველოს“ წევრმა და ვაკის მაჟორიტარობის კანდიდატმა, ელენე ხოშტარიამ, „პატრიოტთა ალიანსის" დაფინანსების შესწავლის მოთხოვნით, პროკურატურაში განცხადება შეიტანა.