„ქართულმა ოცნებამ“ კასპის მოსახლეობას გიორგი ხოჯევანიშვილის კანდიდატურა წარუდგინა

„ქართული ოცნება“ რეგიონებში მაჟორიტარი დეპუტატობის კანდიდატების წარდგენას აგრძელებს. გორის შემდეგ პრემიერ-მინისტრი და გუნდის ლიდერები კასპში იმყოფებიან. ისინი ადგილობრივებს ლამისყანაში ჯამბაკურ ორბელიანის სახლ-მუზეუმის ეზოში შეხვდნენ და საკუთარი მხარდაჭერა გამოხატეს „ქართული ოცნების“ მაჟორიტარი დეპუტატობის კანდიდატის, გიორგი ხოჯევანიშვილის მიმართ.

ხოჯევანიშვილი შიდა ქართლის გუბერნატორი იყო, ახლა კი გორისა და კასპის მაჟორიტარობის კანდიდატია. დღესვე კასპის მერობის კანდიდატიც წარადგინეს. „ქართულ ოცნებას“ კასპის მუნიციპალიტეტში ვახტანგ მაისურაძე წარმოადგენს. კასპის მერმა, მანუჩარ მერებაშვილმა თანამდებობა საკუთარი განცხადების საფუძველზე დატოვა.

კახი კალაძის თქმით, ამ მხარეში დოვლათს მშრომელი ადამიანები ქმნიან და მათ ამისთვის მადლობა გადაუხადა. კალაძემ ჯანდაცვის, ეკონომიკისა და სოფლის მეურნეობის სფეროებში ჩატარებულ რეფორმებზე ისაუბრა და ხაზი გაუსვა სახელმწიფოს მიერ დაფინანსებულ პროექტებს ამ მიმართულებებით. მისი განცხადებით, გარემოს დაცვითი სტანდარტები, რომლებიც ახლა ინერგება, მნიშვნელოვანი იქნება კასპისთვისაც.

გიორგი გახარიას განცხადებით, ბევრი პრობლემა კასპის მუნიციპალიტეტში ოკუპაციის შედეგად წარმოიქმნა და ძლიერი ეკონომიკა და სახელმწიფო სადაც ადამიანის უფლებები დაცული იქნება, არის მთავარი მიზანი და გზა თუ როგორ უნდა დავძლიოთ ოკუპაცია.პრემიერმა ინფრასტრუქტურული პროექტების განხორციელების და სოფლის მეურნეობის განვითარების მნიშვნელობაზეც ისაუბრა. ის საუბრისას შეეხო გატაცებულ მოქალაქეებსაც, რომლებსაც სახელმწიფოს დახმარება სჭირდებათ.

„არჩევნები კიდევ ერთი ეტაპია გავაგრძელოთ საქმიანობა, რომელიც დავიწყეთ. გიორგი იყო შიდა ქართლის გუბერნატორი.მან კარგად იცის რეგიონი, ადგილობრივების პრობლემები და რეგიონის განვითარებისთვის ზრუნვას საქმით შეძლებს“, - აღნიშნა პრემიერმა.