არჩილ თალაკვაძე: ევროპარლამენტის ანგარიში დადებითად აფასებს საქართველოს მიერ ჩატარებულ რეფორმებსა და საკანონმდებლო ცვლილებებს

ევროპარლამენტის მიერ მიღებული ანგარიში დადებითად აფასებს საქართველოს მიერ ასოცირების ხელშეკრულების შესრულებას, აგრეთვე ფართომასშტაბიან რეფორმებს, კანონმდებლობაში განხორციელებულ ცვლილებებს, რომლებიც მიმართულია დემოკრატიის, კანონის უზენაესობისა და ადამიანის უფლებების დაცვის სტანდარტის გაუმჯობესებაზე, - ამის შესახებ პარლამენტის თავმჯდომარემ, არჩილ თალაკვაძემ დიპლომატიური კორპუსის, იუსტიციის უმაღლესი საბჭოსა და არასამთავრობო ორგანიზაციების წარმომადგენლებთან შეხვედრის შემდეგ გამართულ ბრიფინგზე განაცხადა.

„2020 წლის 16 სექტემბერს ევროპარლამენტმა, ყველა ძირითადი ჯგუფის მხარდაჭერით, დიდი უმრავლესობით მიიღო ევროკავშირ-საქართველოს შორის გაფორმებული ასოცირების ხელშეკრულების შესრულებაზე ანგარიში, რომელიც ჩვენი ქვეყნის დემოკრატიული განვითარების ძალიან მნიშვნელოვან თემებს ეხება, მათ შორის პოლიტიკურ დიალოგს, კანონის უზენაესობას, ადამიანის უფლებების დაცვას. ანგარიში დადებითად აფასებს საქართველოს მიერ ასოცირების ხელშეკრულების შესრულებას, აგრეთვე ფართომასშტაბიან რეფორმებს, კანონმდებლობაში განხორციელებულ ცვლილებებს, რომლებიც მიმართულია დემოკრატიის, კანონის უზენაესობისა და ადამიანის უფლებების დაცვის სტანდარტის გაუმჯობესებაზე. ევროპარლამენტი მიიჩნევს, რომ მნიშვნელოვანი პროგრესია საქართველოს საპარლამენტო დემოკრატიის კონსოლიდაციისა და გაძლიერების მხრივ და მიესალმება საქართველოს პარლამენტის მიერ მიღებულ საარჩევნო ცვლილებებს. სამწუხარო იყო, რომ ოპოზიციამ ამ ცვლილებებს მხარი არ დაუჭირა, მიუხედავად იმისა, რომ მათ საჯარო პირობა გასცეს ამასთან დაკავშირებით. ევროპარლამენტი მხარს უჭერს საპარლამენტო არჩევნებს და მინდა დავარწმუნო ისინი, რომ არჩევნები ჩატარდება თავისუფალ, სამართლიან და გამჭვირვალე გარემოში“, - განაცხადა პარლამენტის თავმჯდომარემ

მისივე თქმით, ანგარიშში ხაზგასმულია საქართველოს რეაგირება კორონავირუსთან დაკავშირებით და დადებითად არის შეფასებული პანდემიის წინააღმდეგ საქართველოს ხელისუფლების ქმედებები.

„ევროპარლამენტი გამოხატავს მხარდაჭერას მაკროეკონომიკური სტაბილურობის შესანარჩუნებლად, კერძოდ, საუბარია 150 მილიონი ევროს ოდენობის დახმარებაზე. აქვე მინდა გამოვყო, რომ ევროკავშირი მხარს უჭერს საქართველოს ევროინტეგრაციის პროცესს და ხაზს უსვამს ისეთ მნიშვნელოვან თემებს, როგორიც არის თავისუფალი ვაჭრობის შესახებ ხელშეკრულება და მისი სრულად გამოყენება საქართველოსა და ევროკავშირის მხრიდან. ევროკავშირი ასევე მხარს უჭერს უვიზო მიმოსვლას და ჩვენ ვუფრთხილდებით ევროპის ნდობას საქართველოს მიმართ და მომავალშიც მაქსიმალურად ვითანამშრომლებთან, რათა ეს სიკეთე დაცული იყოს. ასევე მინდა განსაკუთრებით გამოვყო საკითხი, რომელიც ყველას გვაწუხებს - საქართველოს ტერიტორიული მთლიანობის საკითხი საერთაშორისო პარტნიორების დღის წესრიგში ძალიან მაღლა რჩება. ევროპარლამენტი ანგარიშში დაგმო ოკუპაცია და ის ვითარება, რომელიც ოკუპირებულ ტერიტორიებზეა შექმნილი. ანგარიშში ხაზგასმულია დევნილთა დაბრუნების საკითხი - მათი უსაფრთხო და ღირსეული დაბრუნების საკითხი რჩება როგორც ჩვენი ხელისუფლების, ასევე ჩვენი პარტნიორების მნიშვნელოვან პრიორიტეტად“, - განაცხადა თალაკვაძემ.

მისი განცხადებით, რამდენიმე დღის წინ ევროპარლამენტში გაიმართა პოლიტიკური დებატები, გუშინ კი ევროკომისიის პრეზიდენტი გამოვიდა სიტყვით და ოკუპირებულ ტერიტორიებზე ისაუბრა.

„მინდა, კიდევ ერთხელ მკაფიოდ ვთქვა, რადგან ოპონენტებმა არაერთხელ უსამართლოდ გაგვაკრიტიკეს და თქვეს, თითქოს საქართველოს ხელისუფლება არ მუშაობს, რათა აფხაზეთისა და სამაჩაბლოს საკითხები სათანადოდ იყოს წარმოდგენილი საერთაშორისო დღის წესრიგში. ევროპარლამენტის ანგარიშსა და გამართულ დებატებში კარგად ჩანს, რომ ჩვენ მაქსიმუმს ვაკეთებთ, რათა ჩვენი ტერიტორიების ოკუპაციის საკითხი დარჩეს საერთაშორისო დღის წესრიგში. ევროპარლამენტის ანგარიში ასევე ეხება კიბერუსაფრთხოების საკითხებს და ამ მიმართულებით ჩვენ ვაგრძელებთ თანამშრომლობას პარტნიორებთან. ანგარიში ასევე ეხება გენდერულ თანასწორობას, ქალთა და კაცთა თანაბარ მონაწილეობას პოლიტიკურ, ეკონომიკურ და სოციალურ ცხოვრებაში და ამ მიმართულებით ჩვენ მიერ განხორციელებული რეფორმები, მათ შორის საარჩევნო კოდექსში შეტანილი ცვლილებები დადებითი და პროგრესული გახლავთ. მინდა, კიდევ გამოვეხმაურო განათლების მიმართულებას. მოგეხსენებათ, შემდეგი წლების განმავლობაში განათლება, მისი დაფინანსება და ფუნდამენტური რეფორმები ამ მიმართულებით იქნება ჩვენთვის, ჩვენი ხელისუფლებისთვის მნიშვნელოვანი პრიორიტეტი. ევროპარლამენტიც ეხმაურება ამ საკითხს და ნათქვამია, რომ საქართველოს ექნება მომავალშიც მხარდაჭერა, რათა ჩვენმა სტუდენტებმა, პროფესორ-მასწავლებლებმა, მკვლევარებმა მიიღონ მონაწილეობა ევროკავშირის მიერ დაფინანსებულ პროექტებში, განსაკუთრებით, გამოყოფილია „ერასმუს პლიუსის პროგრამა“, რომლითაც 7500-ზე მეტმა ქართველმა სტუდენტმა მიიღო განათლება საერთაშორისო უნივერსიტეტებში. ეს რიცხვი ყოველწლიურად იზრდება. და რა თქმა უნდა, ანგარიშში არის მოცემული ძალიან მნიშვნელოვანი რეკომენდაციები და პრიორიტეტები. ჩვენ, რასაკვირველია, გამოვთქვამთ მზადყოფნას, რომ ჩვენს ევროპელ პარტნიორებთან ერთად, განვაგრძოთ რეფორმები და ეს რეფორმები ემსახურება ჩვენი ქვეყნის დემოკრატიულ განვითარებას და ჩვენი მოქალაქეების კეთილდღეობის გაუმჯობესებას. მე მსურს, საქართველოს პარლამენტის სახელით, მადლობა გადავუხადო ევროპარლამენტის ანგარიშის მომხსენებელს, სვენ მიქსერს, რომლის დამსახურებითაც ანგარიში არის დაბალანსებული და ძალიან საქმიანი, ასევე, მადლობას ვუხდი ყველა ევროპარლამენტარს, ვინც მონაწილეობა მიიღო საქართველოსთან დაკავშირებულ განხილვასა და დებატებში​“, - აღნიშნა თალაკვაძემ.