ირაკლი კობახიძე: საქართველოში პოლიტიკურად მოტივირებული საქმეები არ არსებობს

„საქართველოში პოლიტიკურად მოტივირებული საქმეები არ არსებობს. არიან პოლიტიკური კრიმინალები, რომელთაც კონკრეტული სასჯელი შეეფარდათ და ასეთი ადამიანები პოლიტიკაში არ უნდა რჩებოდნენ“, - განაცხადა საპარლამენტო უმრავლესობის წევრმა, ირაკლი კობახიძემ ევროპარლამენტის ანგარიშთან დაკავშირებული შეკითხვის საპასუხოდ.

მისი თქმით, როცა 48 მილიონს იპარავ, ეს საქმე პოლიტიკურად მოტივირებული ვერ იქნება და უფლება არ გაქვს, პოლიტიკაში დარჩე. ირაკლი კობახიძე მიიჩნევს, რომ საქართველოში ეს პოლიტიკური კულტურა დამკვიდრებული ჯერ არ არის, თუმცა „ქართული ოცნების“ აღმასრულებელი მდივნის განცხადებით, ძალიან მალე ეს კულტურა საბოლოოდ დამკვიდრდება.

„მარტივი კითხვა მინდა დაგისვათ - წელს, რომ მოვიპარო 48 მილიონი და ეს საარჩევნო მიზნებს მოვახმარო, ჩემ მიმართ აღძრული საქმე ოდესმე შეიძლება ჩაითვალოს პოლიტიკურად მოტივირებულად? - რა თქმა უნდა, არა.

პასუხი ნათელია - როცა 48 მილიონს იპარავ, ეს საქმე პოლიტიკურად მოტივირებული ვერ იქნება და უფლება არ გაქვს, პოლიტიკაში დარჩე.

საქართველოში ეს პოლიტიკური კულტურა დამკვიდრებული ჯერ არ არის, თუმცა ძალიან მალე საბოლოოდ დამკვიდრდება. მთლიანობაში, რეზოლუცია ასახავს იმ პროგრესს, რომელსაც ქვეყანა ყველა მიმართულებით განიცდის, შესაბამისად, ეს კარგ საფუძველს ქმნის იმისას, რომ გავაგრძელოთ ჩვენი წინსვლა ევროკავშირში გაწევრიანების მიმართულებით.

ჩვენი სახელმწიფო თავის პოლიტიკაში თანმიმდევრულია და საბოლოოდ, იმ შედეგს მოიტანს, რასაც ჰქვია საქართველოს სრულუფლებიანი წევრობა ევროკავშირში. კიდევ ერთხელ გეტყვით, საქართველოში პოლიტიკურად მოტივირებული საქმეები არ არსებობს.

ანგარიშში მოხვდა იმიტომ, რომ ევროპარლამენტიც არის სხვადასხვა პოლიტიკოსის. იქ არის სხვადასხვა პოლიტიკოსი. საბოლოო ჯამში, გარკვეული კომპრომისების მიღწევა უწევთ. შესაბამისად, რაღაც ჩაიწერა, რასაც არ ვეთანხმებით. ეს არის ერთი პატარა პასაჟი, თუმცა ვხედავთ, რომ ეს ჩანაწერიც არის ძალიან რბილი, ერთგვარი კომპრომისი გამონახეს პოლიტიკოსებმა, მათ შორის, ვინც არ ეთანხმებოდა ამ ჩანაწერს.

ევროპარლამენტში უმეტესობა ამ ჩანაწერს არ ეთანხმებოდა, თუმცა გარკვეული კომპრომისის გამოძებნა ყოველთვის არის საჭირო ისეთ ორგანოებში, როგორიც არის პარლამენტი და მათ შორის ევროპარლამენტი.

მთავარია, რომ საქართველოში პოლიტიკური მოტივით არავინ იდევნება, არიან პოლიტკრიმინალები. მაგალითად, უგულავა, რომელმაც 48 მილიონი მოიპარა, ნიკა მელია, რომელმაც „ქართუ ბანკი“ ადეიშვილის დავალებით გააკოტრა, ისინი არიან ადამიანები, რომლებიც სასტიკად ეპყრობოდნენ სხვა ადამიანებს, მაგალითად, გელაშვილის საქმეზე აქვთ შეფარდებული სასჯელი. არც ერთი მათგანი არ არის პოლიტიკური დევნილი, პოლიტკრიმინალები არიან და საქართველოში პოლიტკრიმინალების დრო მალე დასრულდება“, - აღნიშნა ირაკლი კობახიძემ.

ევროპარლამენტმა საქართველოს ევროკავშირთან ასოცირების შეთანხმების იმპლემენტაციის შესახებ ანგარიში დაამტკიცა. პლენარულ სესიაზე დოკუმენტს 552-მა დეპუტატმა მისცა ხმა, წინააღმდეგი 61 იყო, ხოლო თავი შეიკავა ევროპარლამენტის 78-მა წევრმა.

ერთ-ერთი პუნქტის მიხედვით, ევროპარლამენტი მოუწოდებს საქართველოს ხელისუფლებას, თავი შეიკავოს მედიის თავისუფლებაში ჩარევისგან, მედიასაშუალებების მფლობელების წინააღმდეგ პოლიტიკურად მოტივირებული სასამართლო საქმეების წარმოებისგან და ზომები მიიღონ დეზინფორმაციული კამპანიების თავიდან ასაცილებლად.