მამუკა მდინარაძე: ოპოზიციას ვურჩევ, პროვოკაციულ მინიშნებებს თავი დაანებოს, თითქოს „ქართულ ოცნებას“ არჩევნების გადადება უნდა

ამბობენ, თურმე არჩევნების გადადებას ვფიქრობთ, ამ ყველაფერზე საუბარი არასერიოზულია, რადგან არჩევნების გადადებაზე არ ვფიქრობთ, - ამის შესახებ ჟურნალისტებს პარლამენტის ვიცე-სპიკერმა, მამუკა მდინარაძემ განუცხადა.

მისივე თქმით, რამდენიმე პროვოკაციული განცხადება გაკეთდა იმის თაობაზე, რომ „ქართული ოცნება“ ეპიდემიოლოგიური სიტუაციის გაუარესებასთან დაკავშირებით გეგმავს არჩევნების გადადებას.

მდინარაძის განცხადებით, მსგავსი არა თუ გეგმა, არამედ საუბარიც არ ყოფილა.

„როცა ვამბობთ, რომ ვირუსთან ერთად ცხოვრება უნდა ვისწავლოთ, ეს იმას ნიშნავს, რომ რადიკალური ღონისძიებები, რომელიც პირველ ეტაპზე იყო გათვალისწინებული საჭირო აღარაა და სხვაგვარად უნდა ვიცხოვროთ - არ უნდა გაჩერდეს ეკონომიკა, ქვეყანა და არანაირი აქტივობა, მათ შორის პოლიტიკური აქტივობები და წინასაარჩევნო გარემო, აქტიური უნდა იყოს. არჩევნები ჩვეულ რეჟიმში უნდა ჩატარდეს.

ოპოზიციას ვურჩევ პროვოკაციულ მინიშნებებს თავი დაანებოს, რომ თითქოს „ქართულ ოცნებას“ არჩევნების გადადება უნდა. ჩვენ ასე არ ვფიქრობთ და ჩვენს ნაცვლად ასეთს ნუ იფიქრებენ. დარწმუნებული ვარ, არცერთი რეალური გარემოება არ იქნება საიმისოდ, რომ ოპოზიციის პროვოკაციული განცხადება გამართლდეს იმის თაობაზე, რომ თითქოს „ქართულ ოცნებას“ არჩევნების გადადება უნდა, ეს გამორიცხულია, რადგან ეპიდსიტუაცია კონტროლდება, არის გარკვეული კერები, სადაც ხელისუფლება ცდილობს, რომ წერტილოვანი დარტყმებით და ისეთი შეზღუდვებით, რომელიც ეკონომიკას არ გააჩერებს და წინასაარჩევნო კამპანიას ხელს არ შეუშლის აღმოფხვრას.

დღეს როცა ვირუსი ისეთი საშიშიც აღარაა, სიკვდილიანობის მაჩვენებელი დაბლაა, თუმცა ეს იმას არ ნიშნავს, რომ რეკომენდაციები არ უნდა დავიცვათ, კიდევ უფრო უნდა გავუფრთხილდეთ ერთმანეთს. ჩვენ მაგივრად ნურავინ ნუ ილაპარაკებს, ოპოზიცია იმას კი არ ლაპარაკობს რას ვამბობთ, ფიქრებში შემოგვეჭრნენ და ამბობენ, თურმე არჩევნების გადადებას ვფიქრობთ, ამ ყველაფერზე საუბარი არასერიოზულია, რადგან არჩევნების გადადებაზე არ ვფიქრობთ“, - განაცხადა მამუკა მდინარაძე.