ირაკლი კობახიძე: საერთო სასამართლოების კანონპროექტით მოსამართლების შერჩევის სტრუქტურა არსებითად იცვლება

სამი ძირითადი რეკომენდაცია სათანადოდ ასახულია საერთო სასამართლოების შესახებ კანონპროექტში, რომელიც დღეს მეორე მოსმენით მივიღეთ. მესამე მოსმენა ორი კვირის შემდეგ შედგება. ამის შემდეგ, საბოლოოდ იქნება დახვეწილი პროცედურები უზენაესი სასამართლოს მოსამართლეების არჩევასთან დაკავშირებით, - ამის შესახებ „ქართული ოცნების“ ერთ-ერთმა ლიდერმა ირაკლი კობახიძემ განაცხადა.

ირაკლი კობახიძის განცხადებით, სამივე რეკომენდაცია თავისი შინაარსით არსებითი იყო. „სამივე რეკომენდაცია ასახულია იმ კანონპროექტში, რომელიც დღეს მეორე მოსმენით მივიღეთ. არსებითად, მოსამართლების შერჩევის პროცედურის სტრუქტურა იცვლება. მოსამართლების შერჩევის პროცედურის. დასაბუთების ნაწილში არსებითი ცვლილებები გვაქვს. დასაბუთდება არა მხოლოდ გადაწყვეტილებები, არამედ თითოეული ქულა, რომელიც დაიწერება იუსტიციის უმაღლესი საბჭოს წევრთა მხრიდან. ასევე გასაჩივრების წესია თვისობრივად შეცვლილი. აღვნიშნავ, რომ გასაჩივრება უკვე აჩერებს წარდგენის პროცედურას და ამ პროცესის თითოეულ ეტაპს, რაც არის ძალიან მნიშვნელოვანი ცვლილება. ასევე გვაქვს ღიაობის კუთხით მნიშვნელოვანი ცვლილება. კენჭისყრა არის ღია და გადაწყვეტილების თაობაზე ინფორმაცია სრულად ექნებათ როგორც იუსტიციის საბჭოს წევრებს, ასევე აპლიკანტს, რომელსაც გადაწყვეტილების გასაჩივრება უნდა. ანუ, სახელებით და გვარებით თითოეული გადაწყვეტილება იქნება ხელმისაწვდომი არა მხოლოდ იუსტიციის საბჭოს წევრისთვის, ასევე აპლიკანტებისთვის. სამივე ფუნდამენტური რეკომენდაცია არის ასახული პროექტში“, - განაცხადა ირაკლი კობახიძემ.

კობახიძე ოპონენტების კრიტიკას კანონპროექტის ღიაობის შესახებ არ იზაირებს. „ერთმანეთისგან უნდა გავმიჯნოთ ღიაობა და საჯაროობა. მოთხოვნა იყო ღიაობაზე და რატომ? ღიაობა იძლევა გასაჩივრების სათანადო შესაძლებლობას და ეს პრინციპი ასახულია პროექტში. რაც შეეხება საჯაროობას, ამას თავისი მინუსები აქვს. იმ პირობებში, როცა ქულები და გადაწყვეტილებების შინაარსი და დასაბუთება საჯაროდ ქვეყნდება, არის ალბათობაა იმისა, რომ საბჭოს წევრები წნეხის ქვეშ მოექცნენ სხვადასხვა მხრიდან. ეს შეიძლება იყოს პოლიტიკური პარტიები, მმართველი თუ ოპოზიციური პარტიები, სხვა დაინტერესებული მხარეები და ეს წნეხი მიზანშეუწონელია.

სხვათა შორის, თავის დროზე, სწორედ ღია იყო კენჭისყრა იუსტიციის საბჭოში და ეს აძლევდა ერთ-ერთ მთავარ ინსტრუმენტს ზურაბ ადეიშვილს, რომ სასამართლო ხელისუფლება მთლიანად ეკონტროლებინა. აქედან გამომდინარე ცალსახაა, რომ ღია კენჭისყრას თავისი მინუსები აქვს. თავის დროზე, დაინტერესებული მხარეები, არასამთავროები ითხოვდნენ ღიაობის გაუქმებას. ახლა კონტექსტი შეიცვალა, საპირისპიროს ითხოვენ, ღიაობას დავთანხმდით, საჯაროობის მინუსებიდან გამომდინარე საჯაროობა არ აგვისახავს, მაგრამ რაც მთავარია, კენჭისყრა ღია იქნება და აპლიკანტს საკუთარი პოზიციების დაცვის შესაძლებლობას მისცემს, თუ ფიქრობს, რომ მის მიმართ დამოკიდებულება უსამართლო იყო, მას წარდგენა ეკუთვნოდა, მაგრამ იუსტიციის უმაღლესი საბჭო უსამართლოდ მოექცა“, - განაცხადა კობახიძემ.

პარლამენტმა საერთო სასამართლოების შესახებ კანონში ცვლილებები მეორე მოსმენით დაამტკიცა.