საქართველში 2020 წლის საპარლამენტო არჩევნებს IRI-ის წარმომადგენლები დააკვირდებიან

საერთაშორისო რესპულიკური ინსტიტუტი (IRI) აცხადებს, რომ 2020 წლის საპარლამენტო არჩევნების შეფასების გუნდის საქართველოში ჩამოვა. ამასთან დაკავშირებით, ორგანიზაცია სპეციალურ განცხადებას ავრცელებს.

„დღეს საერთაშორისო რესპუბლიკურმა ინსტიტუტმა (IRI) გააკეთა განცხადება არჩევნების ტექნიკური შეფასების საერთაშორისო მისიის ჩამოსვლის შესახებ. მისია შეაფასებს 2020 წლის, 31 ოქტომბრის საპარლამენტო არჩევნებს. შეფასების მისია საქართველოში ჩამოდის ცენტრალური საარჩევნო კომისიის მოწვევის საფუძველზე. საერთაშორისო რესპუბლიკური ინსტიტუტი (IRI)დაახლოებით 25 წელია საქართველოს პარტნიორია და ბოლო ათწლეულის განმავლობაში განახორციელა თითქმის ყველა არჩვენების მონიტორინგი და შეფასება“, - ნათქვამია განცხადებაში.

„ოქტომბერში დაგეგმილი საპარლამენტო არჩევნები წარმოადგენს მნიშვნელოვან ნაბიჯს საქართველოს დემოკრატიული განვითარებისთვის და გამოცდას ქვეყნის ევრო-ატლანტიკური მისწრაფებებისთვის. IRI-ს მისია ყურადღებას გაამახვილებს იმ საკვანძო საკითხებზე, რომლებიც მნიშვნელოვანია საარჩევნო პროცესის სრულყოფისთვის, მათ შორის როგორიცაა საარჩევნო ადმინისტრაცია, მედიის თავისუფლება და გამჭვირვალობა, პოლიტიკური პარტიების კამპანია და დაფინანსება. გარდა ამისა, მისია ყურადღებას გაამახვილებს კორონავირუსის პანდემიის პერიოდში, ამომრჩევლის უსაფრთხოების დასაცავად შემოღებული ზომების შესრულებაზე“, - განაცხადა საერთაშორისო რესპუბლიკური ინსტიტუტის ევრაზიის დირექტორმა სტივენ ნიქსმა.

„მისია (TEAM) შედგება მრავალმხრივი გამოცდილების მქონე ხუთი გრძელვადიანი ტექნიკური ანალიტიკოსისგან, რომლებიც დააკვირდებიან და შეაფასებენ საარჩევნო პროცესის ყველა ფაზას. მათ მიგნებებზე დაყრდნობით, IRI გამოაქვეყნებს ანგარიშებს, რომლებიც მომზადდება მთავრობისა და საარჩევნო ადმინისტრაციის წარმომადგენლებთან, პოლიტიკური პარტიის ლიდერებთან, სამოქალაქო საზოგადოებისა და მედიის წარმომადგენლებთან სიღრმისეული ინტერვიუების საფუძველზე.

ტექნიკური შეფასების ჯგუფი იმუშავებს არჩევნების საერთაშორისო სადამკვირვებლო პრინციპების დეკლარაციისა და საერთაშორისო დამკვირვებლების ქცევის კოდექსის მიხედვით. მისიის მიგნებები და რეკომენდაციები დაეფუძნება საქართველოს კანონმდებლობას, საერთაშორისო სტანდარტებსა და პოლიტიკური პარტიების მიერ ქცევის კოდექსის ფარგლებში აღებულ ვალდებულებებს.

კორონავირუსისი პანდემიასთან დაკავშირებული საფრთხეების გათვალისწინებით, IRI-მ მიიღო უსაფრთხოების ყველა საჭირო ზომა, რომლებიც თანხვედრაშია საქართველოს მთავრობის მიერ დაწესებულ რეგულაციებთან“, - ნათქვამია ორგანიზაციის განცხადებაში.

საერთაშორისო რესპუბლიკური ინსტიტუტი არის არაკომერციული, უპარტიო საერთაშორისო ორგანიზაცია, რომელიც ხელს უწყობს თავისუფლებისა და დემოკრატიის ხარისხის ამაღლებას მსოფლიოს მასშტაბით. ორგანიზაცია ეხმარება პოლიტიკურ პარტიებს, გახდნენ მეტად პასუხისმგებლიანი მოქალაქეების წინაშე, აძლიერებს ხელისუფლებას რათა ის გახდეს გამჭვირვალე და ანგარიშვალდებული, მუშაობს აამაღლოს ნაკლებად წარმოდგენილ ჯგუფთა - მათ შორის, ქალებისა და ახალგაზრდების - ჩართულობა პოლიტიკურ პროცესებში. დამატებითი ინფორმაციისთვის ეწვიეთ www.iri.org“ ნათქვამია ორგანიზაციის განცხადებაში. .

მმართველი გუნდის განცხადებით, „ქართული ოცნების“ ინტერესებშია, რომ არჩევნებზე რაც შეიძლება მეტი დამკვირვებელი იყოს წარმოდგენილი.

რაც შეეხება სხვა საერთაშორისო ორგანიზაციებს, ეუთო/ოდირი აპირებს, გამოაგზავნოს როგორც გრძელვადიანი, ასევე მოკლევადიანი დამკვირვებლები საქართველოში, - ამის შესახებ დღეს აშშ-ის ელჩმა საქართველოში, კენი დეგნანმა განაცხადა.

როგორც ცნობილია, არჩევნებზე საერთაშორისო დამკვირვებლების ვიზიტთან დაკავშირებით კონკრეტული პროტოკოლი შემუშავდება.

არჩევნები 31 ოქტომბერს ჩატარდება.