დავით ზალკალიანი: პრემიერ-მინისტრის გამოსვლა იყო ყოვლისმომცველი და ყველა აქტუალურ საკითხს ეხებოდა

საქართველოს პრემიერ-მინისტრის გამოსვლა იყო ყოვლისმომცველი და ის თავის გამოსვლაში შეეხო ყველა იმ საკითხს რომელიც აქტუალურია, როგორც საერთაშორისო საზოგადოებისთვის, ასევე საქართველოსთვის, - ასეთი შეფასება მისცა საგარეო საქმეთა მინისტრმა დავით ზალკალიანმა საქართველოს პრემიერ-მინისტრის გიორგი გახარიას გაერო-ს გენერალური ასამბლეის 75-ე სესიაზე სიტყვით გამოსვლას.

„მან ისაუბრა საერთო გამოწვევებზე, კორონავირუსის პანდემიაზე, მასთან ბრძოლაზე და საქართველოს გამოცდილებაზე ამ მხრივ. გაეროს მაღალი ტრიბუნიდან საუბარი შეეხო რუსეთის უკანონო ქმედებებს. მის მიერ ჰიბრიდული ომის ინსტრუმენტების გამოყენებას, დეზინფორმაციულ კამპანიას და კიბერშეტევის განხორციელებას. პრემიერ-მინისტრის გამოსვლაში მნიშვნელოვანი ადგილი დაეთმო სევე რუსეთის აგრესიის შედეგად, საქართველოს ოკუპირებულ ტერიტორიებზე არსებულ ვითარებას, როგორც უსაფრთხოების ასევე ჰუმანიტარული მიმართულებით. ხაზი გაესვა 2008 წლის 12 აგვისტოს ცეცხლის შეწყვეტის შესახებ შეთანხმების შესრულებას და ჟენევის საერთაშორისო მოლაპარაკებების ფარგლებში კონსტრუქციული პოზიციის დაკავების აუცილებლობას, რისთვისაც პრემიერ-მინისტრმა საერთაშორისო საზოგადოებას შესაბამისი ძალისხმევის გამოჩენისკენ მოუწოდა. პრემიერმა ასევე ისაუბრა საქართველოს ხელისუფლების სამშვიდობო ინიციატივებზე და გაეროს ტრიბუნიდან მიმართა ჩვენს თანამემამულეებს საოკუპაციო ხაზის მეორე მხარეს, რომ საქართველოს სურს და შეუძლია მათთვის ჩვენს ხელთ არსებული ყველა სიკეთის და მონაპოვრის გაზიარება, როგორც მშვიდობიან, თავისუფალ, დემოკრატიულ და კორუფციისგან თავისუფალ საზოგადოებაში ცხოვრება, ასევე ევროკავშირთან დაახლოებით მიღებული შესაძლებლობების, მათ შორის თავისუფალი ვაჭრობის და უვიზო მიმოსვლის გაზიარება. პრემიერმა თავის გამოსვლაში ასევე ხაზი გაუსვა საქართველოს ევროპული და ევროატლანტიკური ინტეგრაციის კურსს, რაც ასახულია ქვეყნის კონსტიტუციაში და გადასინჯვას არ ექვემდებარება. ამ კონტექსტში აღინიშნა, ჩვენი თანამონაწილეობა საერთაშორისო მშვიდობის განმტკიცებაში და გამოსვლაში ასევე საუბარია, ქვეყნის დემოკრატიზაციაზე, მათ შორის განხორციელებულ საკონსტიტუციო ცვლილებებზე და მომავალ არჩევნებზე. პრემიერმა ასევე ყურადღება გაამახვილა საქართველოს ეკონომიკურ პრიორიტეტებზე და მის მიმზიდველობაზე, როგორც ბიზნესის კეთების სიმარტივით, ასევე საქართველოსა და შავი ზღვის რეგიონის მნიშვნელოვან დამაკავშირებელ როლზე დასავლეთსა და აღმოსავლეთს შორის, რაც ქვეყანას სძენს სატრანსპორტო და ენერგეტიკული ჰაბის ფუნქციას. მნიშვნელოვანია, რომ პრემიერის მთელ გამოსვლას ლაითმოტივად გასდევდა პოზიცია, რომ კაცობრიობის წინაშე არსებული პრობლემების გადაწყვეტა, მშვიდობისა და კეთილდღეობის მიღწევა შესაძლებელია მხოლოდ ერთობლივი ძალისხმევით. გაეროს ქარტიის და საერთაშორისო სამართლის ძირითად პრინციპებზე დაყრდნობით“, - განაცხადა დავით ზალკალიანმა.