თალაკვაძე: არ არის გამორიცხული ირაკლი კობახიძემ საკონსტიტუციო პროექტი მოსახლეობას პრეზიდენტის გარეშე გააცნოს

საპარლამენტო უმრავლესობის ლიდერის არჩილ თალაკვაძის განცხადებით, ირაკლი კობახიძის შეთავაზება, რომ  საკონსტიტუციო ცვლილებათა პროექტზე პრეზიდენტთან ერთად პირდაპირ ეთერში იმსჯელონ, კვლავ ძალაშია.

იმ შემთხვევაში კი, თუ პრეზიდენტი შეთავაზებას არ დათანხმდება, თალაკვაძე არ გამორიცხავს, რომ ღია ეთერის საშუალებით ვენეციის კომისიის დასკვნა და საკონსტიტუციო ცვლილებები პარლამენტის თავმჯდომარემ საზოგადოებას პრეზიდენტის გარეშე გააცნოს.

„საქართველოს პრეზიდენტმა ირაკლი კობახიძის შეთავაზებას უპასუხა, რომ ჩვენ არ გვინდა საზოგადოებასთან პირისპირ ამაზე მსჯელობა. მოდი შევიკრიბოთ სასახლეში, სადაც მე დავუძახებ პოლიტიკურ პარტიებს, მობრძანდით თქვენც და იქ ვილაპარაკოთ ამაზე. სამსახურიდან რომ გვინდოდეს ჩვენ საზოგადოებასთან საუბარი, არ გაგვიჭირდებოდა ან ერთი ან მეორე სასახლე შეგვეთავაზებინა პრეზიდენტისთვის. მაგრამ აქ არის პრინციპულად განსხვავებული ფორმატი, აქ არის დემოკრატიული ფორმატი, საზოგადოებასთან პირდაპირი კომუნიკაციის შენაცვლება სასახლეში შეკრებით, ეს არის უბრალოდ გაქცევა ამ ფორმატიდან, გაქცევა იმისგან, რომ საზოგადოებას აუხსნას პრეზიდენტმა თავისი არგუმენტები,“- განაცხადა საპარლამენტო უმრავლესობის ლიდერმა. მისივე თქმით, ამ შეთავაზებაზე უარის თქმა პრეზიდენტს სავარაუდოდ სურს, რომ პარლამენტის თავმჯდომარესთან დააპირისპიროს ოპოზიციური პარტიები და ის ადამიანები, რომლებსაც რეალური არგუმენტები აღარ დარჩათ ვენეციის კომისიის დასკვნის შემდეგ.

თალაკვაძემ იმედი გამოთქვა, რომ პრეზიდენტი გადაწყვეტილებას შეცვლის და პირდაპირი ეთერის ფორმატს დათანხმდება. 

დღეს, პრეზიდენტის ადმინისტრაციის უფროსმა გიორგი აბაშიშვილმა განაცხადა, რომ პრეზიდენტი პარლამენტის თავმჯდომარეს საკონსტიტუციო ცვლილებების განხილვის ალტერნატიულ ფორმატს სთავაზობს. "ვთავაზობთ აქ პრეზიდენტის სასახლეში გაიმართოს შეხვედრა, რომელშიც მონაწილეობას მიიღებენ პრეზიდენტი, პარლამენტის თავმჯდომარე, პრემიერმინისტრი, სახალხო დამცველი, პოლიტიკური პარტიები, არასამთავრობო ორგანიზაციები, ექსპერტები და ბიზნესასოციაციები,"- განაცხადა გიორგი აბაშიშვილმა. ამ განცხადებას უკვე გამოეხმაურა ირაკლი კობახიძე. "ეს ფაქტი კიდევ ერთხელ ცხადყოფს, რომ პრეზიდენტი არ არის მოწოდებული, ხელი შეუწყოს კონსესუსის ჩამოყალიბებას და თავს არიდებს ისეთ ფორმატს, რომელიც საზოგადოებას სრულფასოვან წარმოდგენას შეუქმნიდა საკონსტიტუციო ცვლილებების შესახებ,"- განაცხადა კობახიძემ. 

ყველაფერი იმით დაიწყო, რომ საქართველოს პარლამენტის თავმჯდომარე პრეზიდენტს შესთავაზა, კონსტიტუციური კანონის პროექტის შესახებ პირდაპირ ეთერში, ერთად იმსჯელონ. „ჩვენ შეგვიძლია, პრეზიდენტთან ერთად, დებატებზე აქ არ არის საუბარი, დავსხდეთ ჟურნალისტების წინაშე,მედიაში, საზოგადოების წინაშე და არსებული დოკუმენტი ავუხსნათ. პირობა შემიძლია, მოგცეთ, რომ ასეთი ერთობლივი განხილვის პირობებში, ყველა ჟურნალისტი, საზოგადოება დარწმუნდება, რომ ეს დოკუმენტი რეალურად არის სამართლებრივად აბსოლუტურად გამართული და აყალიბებს ძალიან დახვეწილ საპარლამენტო მმართველობის სისტემას“,- განაცხადა ირაკლი კობახიძემ „იმედთან“ საუბრისას.